فوتو: Sputnik قىرعىزستان.

قىرعىزستان ءبىر ايدان استام ۋاقىت بويى قازاقستان بيلىگىنىڭ قىڭىرلىعىنان ەاەو ەلدەرىمەن بايلانىس ورناتا الماي وتىر. وسىدان كەيىن كىم ەۋرازيالىق ەكونوميكالىق وداقتى قۇلاتپاق؟ – دەدى المازبەك اتامباەۆ ۇلتتىق كەڭەس وتىرىسىندا سويلەگەن سوزىندە.

قاراشا ايىنىڭ 15-ءسى كۇنى بىشكەك قالاسىندا ءوتىپ جاتقان ۇلتتىق كەڭەس وتىرىسىندا المازبەك اتامباەۆ قازاق-قىرعىز شەكاراسىنداعى داۋعا بايلانىستى پىكىر ءبىلدىردى. وندا ول: «سوڭعى قارجى داعدارىسى بىزگە قاراعاندا مۇناي مەن گازعا باي كورشىلەرىمىزگە اۋىر سوققى بولىپ ءتيدى. ءبىز قىرعىزستاندا ۆاليۋتا تەربەلىسى مەن ءجىو كورسەتكىشىن كورشىلەرىمىزبەن سالىستىرعاندا جوعارى دەڭگەيدە ۇستاپ قالا الدىق. ۇلكەن بيزنەس جاساۋ ءۇشىن ۇلكەن كولەمدەگى تۇتىنۋشى قاجەت. سول سەبەپتى ءبىز ەاەو-عا مۇشە بولدىق. مەن بۇنى دۇرىس شەشىم دەپ ەسەپتەيمىن جانە الداعى ۋاقىتتا ءبىز اتالمىش وداقتا قالۋىمىز كەرەك. مەن بۇل سوزدەردى نە ءۇشىن قايتالاپ وتىرمىن؟ سەبەبى مەن كۇندە رەسەيلىك جانە قازاقستاندىق باق-تى وقيمىن. وندا «اتامباەۆ ەۋرازيالىق ەكونوميكالىق وداقتى قۇلاتپاق» دەپ جازۋدا. قىرعىزستان ءبىر ايدان استام ۋاقىت بويى قازاقستان بيلىگىنىڭ قىڭىرلىعىنان ەاەو ەلدەرىمەن بايلانىس ورناتا الماي وتىر. وسىدان كەيىن كىم ەۋرازيالىق ەكونوميكالىق وداقتى قۇلاتپاق؟ بۇنداي پىكىردى تەك اقىماقتار مەن بۇل جاعدايدى كورگىسى كەلمەيتىندەر عانا ايتادى. قىرعىزستان اتامباەۆتىڭ "قىرعىز ەلىنىڭ ىشكى ساياساتىنا ارالاسپاڭدار" دەگەن ءسوزى ءۇشىن قورشاۋدا قالىپ وتىر. مەنى تاڭ قالاتىنىم ەاەو-عا مۇشە وزگە مەملەكەتتەر بۇل ماسەلەگە مۇلدە باس قاتىرماۋدا. ەۋرازيالىق ەكونوميكالىق وداق كوميسسياسىنىڭ توراعاسى تيگران ساركيسيان وسى ماسەلەنى شەشۋ ءۇشىن وسى ارادا شىر-پىر بولىپ جۇگىرۋى ءتيىس بولعان. بىراق ولاردىڭ بۇعان تۇكىرگەنى بار. وسىدان كەيىن ولار قىرعىزستان جايىندا اڭگىمە قوزعايدى» - دەدى.

ەستەرىڭىزگە سالايىق، قازاق-قىرعىز شەكاراسىنداعى داۋ قازان ايىنىڭ 10-ى كۇنىنەن باستالعان. سول كۇنەن باستاپ قازاقستان تاراپى قىرعىزستانمەن اراداعى شەكارانى كۇشەيتىلگەن رەجيمدە جۇمىس ىستەۋگە كوشىرگەن بولاتىن.

“The Qazaq Times”