فوتو: Forbes.kz

Bank RBK-نىڭ پروبلەمالى پورفەلىمەن جۇمىس ۇستەۋ كەزىندە تۇسكەن قاراجات بانكتىڭ ءىرى كرەديتورلار الدىنداعى قارىزىن جابۋعا جۇمسالادى. بۇل تۋرالى قر ۇلتتىق بانكى توراعاسىنىڭ ورىنباسارى ولەگ سمولياكوۆ مالىمدەدى.

بۇگىن پارلامەنت سەناتىنىڭ پلەناردى وتىرىسىندا دەپۋتاتتار Bank RBK پەن Delta bank-تە بولىپ جاتقان جاعدايلاردى ءتۇسىندىرۋدى سۇرادى.

"قازىرگى كەزدە قازاقستاندا بانك سەكتورىن ساۋىقتىرۋ ماسەلەسى تەندەنتسياعا اينالدى. ۇلتتىق بانك پروبلەمالى بانكتەردى ساۋىقتارۋ شارالارىن جانە جاعدايدى تۇراقتاندىرۋ جۇمىستارىن ەندى عانا قولعا الىپ جاتىر. مۇنداي جاعدايدا رەتتەۋشى ءبىرىنشى كەزەكتە تاۋەكەل جاساۋ مودەلدەرىن ناقتىلاپ، وسىنداي جاعدايلارعا جول بەرمەۋى ءتيىس. ەندى ەكىنشى دەڭگەيلى بانكتەردە وسىنداي داعدارىستىق جاعدايلاردى الدىن الۋ ءۇشىن قانداي جۇيەلى شارالار جوسپارلانىپ جاتىر؟ پروبلەمالى بانكتەرگە مەلمەكەتتىك كومپانيالاردىڭ  قارجىسىن ورنالاستىرۋ بويىنشا كىم جاۋاپ بەرەدى؟", - دەدى سەنات دەپۋتاتى ەربولات مۇقاەۆ.

ال ولەگ سمولياكوۆ بولسا Bank RBK-نىڭ پروبلەمالى پورتفەلى ءۇشىن بەرىلەتىن 600 ملرد تەڭگە 5 جىلدا قايتارىلۋى مۇمكىن ەكەنىن ايتتى.

"وسى پورتفەلمەن جۇمىس ىستەۋ كەزىندە تۇسكەن قاراجاتتىڭ بارلىعى ءىرى كرەديتورلاردان الىنعان قاعازداردى تولەۋگە جۇمسالادى. بانك جۇيەسىندەگى پراكتيكاعا سۇيەنە وتىرىپ، بۇل نەسيەلەر  كەپىلدەندىرىلمەگەندىكتەن، قاراجات پەن ماتەريالدىق ەمەس اكتيۆتەردى قايتارۋ بەس جىلعا دەيىن بولادى دەپ بولجاپ وتىرمىز", - دەدى سمولياكوۆ.

ايتا كەتەيىك، سوڭعى ۋاقىتتا اتالعان بانككە قاتىستى قارجى ماسەلەلەرى تۋىنداعان بولاتىن. سەبەبى Bank RBK قىزمەتىن قولدانۋشىلار اقشا شەشىپ الۋ مۇمكىن بولماعانى جانە كەيبىر ستۋدەنتتەر ستيپەنديالارىن الا الماعاندارى تۋرالى ايتقان. وسىدان كەيىن ۇلتتىق بانك اتالعان بانكتەن جاعدايدى رەتتەۋدى تالاپ ەتكەن. ال پرەزيدەنت نۇرسۇلتان نازارباەۆ بانك جۇمىسى رەتتەلەتىنىن جانە كىنالىلەر جازالاناتىنىن ايتقان.

سونداي-اق،  قر ۇلتتىق بانك توراعاسى دانيار اقىشەۆ "قازاقمىس" كورپوراتسياسى Bank RBK-عا ينۆەستور بولۋى مۇمكىن ەكەنىن حابارلاعان ەدى.

“The Qazaq Times”