وزبەكستان قازاقستاندىق ينۆەستورلارمەن تىعىز جۇمىس ىستەۋگە دايىن. بۇل تۋرالى  تاشكەنتتە شەتەلدىك جانە جەرگىلىكتى ينۆەستورلاردىڭ ۇسىنىستارىن اشىق تالقىلاۋ الاڭىندا ايتىلدى.

بۇگىندە جۇيەلى جۇمىستىڭ ناتيجەسىندە ەكى ەل اۋماعىندا بىرنەشە بىرلەسكەن كاسىپورىن جۇمىس ىستەپ تۇر. الداعى ۋاقىتتا  قوس ەلدىڭ ماشينا جاساۋ سالاسى ودان ءارى جاندانا تۇسپەك.

جيىندا وزبەكستانداعى ەڭ ءىرى ماشينا جاساۋ جانە اۋىل شارۋاشىلىعى تەحنيكالارى مەن ەلەكتر جابدىقتارىن شىعاراتىن كومپانيالار وزدەرىنىڭ ينۆەستيتسيالىق مۇمكىندىكتەرىن تانىستىردى.

بۇعان دەيىن ءبىزدىڭ ەلگە جەڭىل كولىك ەكسپورتتاپ كەلگەن وزبەكستاندىقتار، ەندى قازاقستاندىق كاسىپكەرلەردى بىرلەسىپ جۇمىس ىستەۋگە شاقىرادى. وعان قوسا پرەزيدەنت جارلىعىمەن تامىز ايىنان باستاپ وزبەكستاندا شەتەلدىك  كاپيتالى بار كاسىپورىندار قۇرۋ جەڭىلدەتىلدى.

باحودير راحمونوۆ، «ۋزاۆتوسانوات» اق ستراتەگيالىق جوسپارلاۋ ءبولىمىنىڭ باستىعى:  - البەتتە قازاقستاننان بولسىن،  باسقا ەلدەردەن بولسىن، جالپى ينۆەستيتتسيا سالۋشىلار بولسا ءبىز ولارمەن تىعىز بايلانىس ورناتۋعا دايىنبىز. جوبانى الدىمەن بىرگە وتىرىپ تالقىلايمىز، مۇمكىندىكتەرىن سارالاپ، قىزىعۋشىلىق بولسا ورتاق جۇمىس ىستەيمىز. قاجەت بولسا بارلىق جاعىنان قولداۋ كورسەتەمىز.

نودير ابدۋللاەۆ، وزبەكستان ينۆەستيتتسيالىق كوميتەتى ينۆەستيتتسيالىق ءبولىم باسشىسى:  - ءبىز بۇگىنگى شارانى وتكىزۋ ارقىلى سول مۇمكىندىكتەرگە بىرلەسە شىعۋدىڭ جولىن قاراستىردىق. وعان قوسا وسىعان قىزۋعىشىلىق تانىتىپ وتىرعان ينۆەستورلاردىڭ الەۋەتىن ارتتىرۋدى كوزدەپ وتىرمىز.

“The Qazaq Times”