سوورونباي جەەنبەكوۆ. فوتو: Sputnik قىرعىزستان.

جاقىن ۋاقىتتا قازاق-قىرعىز شەكاراسىنداعى داۋ شەشىلەتىن بولادى –دەپ مالىمدەدى قىرعىزستاننىڭ سۋ جاڭا پرەزيدەنتى سوورونبوي جەەنبەكوۆ.

سوورونباي جەەنبەكوۆ پرەزيدەنت سايلاۋىنان بەرى العاش رەت رەسەيلىك ريا نوۆوۆستي اقپارات اگەنتتىگىنە بەرگەن سۇحباتىندا: «قازاق-قىرعىز قارىم-قاتىناسى ورتاق تاريح، ورتاق مادەنيەت، ورتاق ءدىن جانە باۋىرلاستىق نەگىزىندە قۇرىلعان. ەكى ەل شەكاراسىنداعى قازىرگى داۋ ۋاقىتشا دۇنيە. بۇل ماسەلەنى شەشۋ ءۇشىن قوس تاراپ بىرنەشە رەت كەزدەسۋلەر وتكىزدى. الداعى ۋاقىتتا قازاق-قىرعىز قارىم-قاتىناسىنداعى تۇسىنىسپەستىك مىندەتتى تۇردە شەشىلەتىنىنە مەن سەنىمدىمىن» - دەگەن.

ەستەرىڭىزگە سالايىق، بۇعان دەيىن قىرعىزستان پرەمەر-ءمينيسترى ساپار يساكوۆ تاشكەنت قالاسىندا وتكەن تمد ەلدەرى ۇكىمەت باسىشىلارى كەڭەسىنىڭ كەزەكتى وتىرىسىندا قازاقستان بيلىگىن قاتاڭ سىنعا العان. ول وندا قازاقستان تاراپىنىڭ شەكارانى نەگىزسىز كۇشەيتكەنىن ايتىپ، بۇل ماسەلە شەشىلمەسە الداعى ۋاقىتتا دۇنيەجۇزى ساۋدا ۇيىمىندا اتالمىش ماسەلەنى كوتەرەتىندىگىن مالىمدەگەن بولاتىن.

“The Qazaq Times”