الماتىدا قۇقىقتىق قىزمەت كورسەتەتىن ورتالىق اشىلدى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى حابارلادى. ورتالىعىنىڭ اشىلۋىنا قر باس پروكۋرورى  جاقىپ اسانوۆ پەن الماتى اكىمى باۋىرجان بايبەك قاتىستى.

«ءبىر تەرەزە» قاعيداسى  بويىنشا جۇمىس ىستەيتىن قۇقىقتىق قىزمەت كورسەتۋ ورتالىعىنان قالا تۇرعىندارى ناقتىلى  ءىس بويىنشا وزدەرىنە قاجەت بارلىق اقپاراتتى ورتالىق وپەراتورلارىنان الادى. جۇمىس فورماتى حالىققا قىزمەت كورسەتۋ ورتالىقتارىنىڭ جۇمىسىنا ۇقساس، كەلۋشىلەر الدىمەن رەسەپشەننەن ءوتىپ، كەڭەس  الادى. سودان سوڭ وزدەرىن تولعاندىرعان ماسەلە بويىنشا  وپەراتورلارعا بارادى، ولار كەلۋشىلەردى پروكۋرورلارعا، ادۆوكاتتارعا، مەدياتورلارعا جانە باسقا دا ماماندارعا جىبەرەدى، بۇلاردىڭ بارلىعى تەگىن زاڭگەرلىك ىقزمەت كورسەتەدى.

قۇقىقتىق قىزمەت ورتالىعىنىڭ جالپى كولەمى 600 شارشى مەتر، زاماناۋي ينجەنەرلىك- تەحنيكالىق قوندىرعىلارمەن جابدىقتالعان جايلى كەڭسە، مۇندا ەلەكتروندى  كەزەك جۇيەسى، «Connection Point» وزىنە-ءوزى قىزمەت كورسەتۋ سەكتورى، كۇتۋ زالى جانە باسقا قاجەتتى ينفراقۇرىلىمدار بار. ورتالىق قابىرعالارى شىنىدان جاسالعان، ول قۇقىققورعاۋ قۇرىلىمدارىنىڭ اشىقتىقتىعىن، جاريالىلىعىن قامتاماسىز ەتەدى.

«ورتالىقتىڭ مىندەتى ساپالى قۇقىقتىق قىزمەت كورسەتۋ. ونىڭ اشىلۋى مەملەكەتتىك جانە قۇقىق قورعاۋ ورگاندارىنىڭ جۇمىسىن اشىق ەتەدى جانە تۇرعىنداردىڭ سەنىمىن ارتتىرادى. ءاربىر الماتىلىق  قۇقىق قورعاۋ ورتالىعىنا كەلگەن سوڭ ساپالى كومەك الاتىنىنا سەنىمدى بولۋى ءتيىس. ءبىزدى قولداعان جانە ورتالىقتىڭ اشىلۋىنا بارلىق جاعدايدى جاساعان الماتى اكىمدىگىنە العىسىمدى بىلدىرەمىن. ورتالىق قىزمەتكەرلەرىنىڭ باستى مىندەتى – ساپالى  قىزمەتتى قامتاماسىز ەتۋ»، - دەدى  باس  پروكۋرور.

“The Qazaq Times”