فوتو: Sputnik كازاحستان

ءبىر ايعا جۋىق ۋاقىتتا قىرعىزستان تاسىمالداۋشىلارى قازاقستان رەسپۋبليكاسى زاڭناماسىن 360 رەت بۇزعان، دەپ حابارلايدى ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى.  

مينيسترلىكتىڭ كولىك كوميتەتى وكىلدەرىنىڭ مالىمەتىنشە، بيىل قازان ايىنىڭ 10-ى مەن 30-ى ارالىعىندا  قىرعىز رەسپۋبليكاسىنىڭ 3054 اۆتوكولىك قۇرالى تەكسەرىلگەن.

"تەكسەرىستەردىڭ ناتيجەسىندە تاسىمالداۋشىلارعا جالپى سوماسى 11,8 ميلليون تەڭگە كولەمىندە ايىپپۇل سالىندى. ەڭ ءجيى كەزدەسەتىن زاڭ بۇزۋشىلىق تەز بۇلىنەتىن جۇكتەردى تاسىمالداۋ سەرتيفيكاتىنىڭ بولماۋى.  مۇنداي زاڭ بۇزۋشىلىقتىڭ ۇلەسىندە 151 دەرەك  بار نەمەسە 40%-دى قۇرايدى", - دەلىنگەن ءباسپاسوز حابارلاماسىندا.

سونداي-اق، تاۋار-كولىك جۇك قۇجاتىنىڭ (CMR) بولماعانى ءۇشىن تاسىمالداۋشىلارعا 103 رەت ايىپپۇل سالىندى; سالماق جانە گاباريت پارامەترلەرىن ساقتاماعانى ءۇشىن 69 رەت; جولاۋشىلاردى تۇراقسىز تاسىمالداۋعا ارنالعان  قازاقستاندىق رۇقسات بلانكىلەرىنىڭ بولماعانى ءۇشىن 13 رەت; كابوتاجدى تاسىمال جاساعانى ءۇشىن –11 رەت; جۇكتەردى تاسىمالداۋ ەرەجەلەرىن بۇزعانى ءۇشىن 6 رەت; قاۋىپتى جۇكتەردى تاسىمالداۋ ەرەجەلەرىن بۇزعانى ءۇشىن 5 رەت جانە تاعى باسقا داەرەجەلەردى بۇزعانى ءۇشىن ايىپپۇلدار سالىندى.

ايتا كەتەيىك، سوڭعى ايدا قازاق-قىرعىز اراسىندا ساياسي -ەكونوميكالىق جاعداي شيەلەنىسە تۇسكەن. قىرعىز پرەزيدەنتى المازبەك اتامباەۆتىڭ بىرنەشە رەت قازاقستانعا قاراتا ايتقان مالىمدەمەلەرى قازاق بيلىگىن ءۇنسىز قالدىرعان جوق. الايدا بۇل تەكەتىرەستەن بيلىك ەمەس، شاعىن بيزنەس وكىلدەرى مەن قاراپايىم حالىق زارداپ شەگىپ وتىر.

“The Qazaq Times”