فوتو: ۆەستنيك كاۆكازا

ۇرىس ءىس-قيمىلدارىن توقتاتۋ رەجيمىنە كەپىلگەر ەلدەردىڭ ءوزارا كەلىسۋىمەن، استانا پروتسەسى اياسىنداعى ءسۇريا جونىندە جوعارى دەڭگەيدەگى جەتىنشى حالىقارالىق كەزدەسۋ 2017 جىلى 30-31 قازاندا وتەدى. بۇل تۋرالى قر سىرتقى ىستەر مينيسترلىگىنىڭ ءباسپاسوز قىزمەتى حابارلادى.

كەلىسسوزدەر بارىسىندا تۇتقىنداردى، قاماۋدا وتىرعانداردى بوساتۋ، قازا تاپقانداردىڭ دەنەلەرىن بەرۋ جانە ءىز-ءتۇزسىز جوعالعانداردى ىزدەستىرۋ بويىنشا جۇمىس توبىنىڭ ەرەجەسىن بەكىتۋ جوسپارلانىپ وتىر. سونداي-اق، تاراپتار حالىقارالىق تەرروريزممەن كۇرەس ماسەلەلەرىن قاراستىرۋعا جانە ءسۇريادا گۋمانيتارلىق مينادان تازارتۋ جۇمىستارىن جۇرگىزۋ تۋرالى بىرلەسكەن مالىمدەمەنى قابىلداۋعا نيەتتى. ءوزارا قىزىعۋشىلىق تۋدىراتىن باسقا دا ماسەلەلەردىڭ تالقىلانۋى ىقتيمال.

ۆەدومستۆونىڭ مالىمەتىنشە، استانادا قىركۇيەكتە وتكەن كەلىسسوزدەردىڭ التىنشى راۋندى تاراپتاردىڭ ءسۇريادا دەەسكالاتسيا ايماقتارىن قۇرۋ تۋرالى مەموراندۋم ەرەجەلەرىن ىسكە اسىرۋ جانە استانا پروتسەسى اياسىندا وسىعان دەيىن قابىلدانعان باسقا دا شەشىمدەردىڭ ورىندالۋى بويىنشا جۇمىستى جالعاستىرۋ نيەتى راستالعان بىرلەسكەن مالىمدەمەنى قابىلداۋمەن اياقتالعان. ءسۇريادا قۇرىلعان دەەسكالاتسيا ايماقتارى اتالعان قاقتىعىستىڭ كولەمىن ەداۋىر تومەندەتىپ، ەلدەگى گۋمانيتارلىق جاعدايدى جاقسارتۋعا مۇمكىندىك بەردى.

“The Qazaq Times”