استانا پروتسەسى: ءسۇريا ماسەلەسى بويىنشا كەلىسسوزدەر اياقتالدى

نۇر-سۇلتاندا 1-2 تامىز ارالىعىندا وتكەن ءحىىى ءسۇريا ماسەلەسى بويىنشا كەلىسسوز مارەسىنە جەتتى. ناتيجەسىندە استانا پروتسەسىنىڭ كەپىل ەلدەرى يدليبتەگى بەيبىت حالىقتىڭ قاۋىپسىزدىگىن ساقتاۋ ءۇشىن ناقتى شارا قابىلداۋ تۋرالى شەشىمگە كەلگەن.

كەلىسسوزدەر بارىسىندا استانا پروتسەسىنىڭ كەپىل ەلدەرى – تۇركيا، رەسەي جانە يران دەلەگاتسياسى سۇرياداعى قاقتىعىسقا توسقاۋىل بولۋ، يدليبتەگى حال-احۋال، تۇتقىنداردى بوساتۋ، بەيبىت تۇرعىندار ءومىرى سىندى ماسەلەلەردى تالقىلاعان. رەسمي مالىمەتتەرگە سۇيەنسەك، تاراپتار ءسۇريانىڭ كونستيتۋتسيالىق كوميتەتىن قۇرۋ ماسەلەسىنە باسا نازار اۋدارعان. سونىمەن قاتار، يدليب بويىنشا بارلىق كەلىسىم ورىندالۋى ءتيىس دەيدى دەلەگاتسيا وكىلدەرى. ەڭ الدىمەن، 2018 جىلعى مەموراندۋم ساقتالۋى قاجەت (يدليبتە دەميليتاريزاتسيالانعان اۋماق قۇرۋ تۋرالى كەلىسىم).

وسىعان دەيىن رەسەي مەن تۇركيا قورعانىس مينيسترلەرى سوچيدە كەزدەسىپ، يدليب دەەسكالاتسيا اۋماعىنداعى احۋالدى تۇراقتاندىرۋ تۋرالى مەموراندۋمعا قول قويعان جانە يدليب دەميليتاريزاتسيالانعان اۋماعىن قۇرۋعا كەلىسكەن بولاتىن.

قازاقستان سىرتقى ىستەر ءمينيسترىنىڭ وكىلى رومان ۆاسيلەنكو: «استانا پروتسەسىنىڭ اياسىندا وتكەن 13-ءشى كەزدەسۋدىڭ قورىتىندىسىنا قاناعاتتانىپ وتىرمىز، سەبەبى بۇل – ءسۇريادا بەيبىتشىلىك ورناتۋ ءۇشىن جان-جاقتى كۇش جۇمساۋدىڭ ماڭىزدى بولىگى. بۇگىنگى جوعارى دەڭگەيلى كەزدەسۋ – كەپىل ەلدەردىڭ قوسقان ەلەۋلى ۇلەسى»، – دەپ مالىمدەدى.

2011 جىلى ءسۇريادا قارۋلى قاقتىعىس باستالعالى بەرى استانادا ءسۇريا ماسەلەسىن رەتتەۋ جونىندەگى كەلىسسوز جەتى مارتە ۇيىمداستىرىلدى. نۇر-سۇلتان كەلىسسوزىنە قولداۋ كورسەتۋشى ەلدەردىڭ ارقاسىندا، سۇرياداعى قاقتىعىس ۋاقىتشا توقتاتىلدى. رەسەي، يران جانە تۇركيا اتالعان ماسەلە جونىندەگى كەلىسىمشارتتى ورىنداۋشى كەپىلگەر-ەلدەر سانالادى.

2017 جىلى قاڭتار، اقپان، ناۋرىز، مامىر ايلارىندا ءسۇريا داعدارىسىنا بايلانىستى ءتورت رەت كەزدەسۋ ءوتتى. ناتيجەسىندە كەلىسسوزگە قاتىسۋشى تاراپتار ءسۇريا جەرىندە قاۋىپسىز اۋماقتار قۇرۋعا بايلانىستى ماملەگە كەلگەن.

"The Qazaq Times"