يران پرەزيدەنتى حاسان رۋحاني، تۇركيا باسشىسى رەجەپ تايىپ ەردوعان جانە رەسەي پرەزيدەنتى ۆلاديمير پۋتين.

سۇرياداعى جاعدايدى تۇراقتاندىرۋعا ارنالعان استانا پروتسەسىنىڭ كەپىل-مەملەكەت كوشباسشىلارى بۇگىن انكارادا باس قوسپاق.

بەسىنشى كەزدەسۋگە يران پرەزيدەنتى حاسان رۋحاني، رەسەي پرەزيدەنتى ۆلاديمير پۋتين قاتىسادى. تۇركيا باسشىسى رەجەپ تايىپ ەردوعان مەن پۋتين سۇريالىق ماسەلەلەردەن بولەك اسكەري-تەحنيكالىق سەرىكتەستىكتى دە تالقىلاماق.

ءۇش جاقتى كەزدەسۋدىڭ باستى تاقىرىبى – قىركۇيەكتە ىسكە قوسىلاتىن سۇرياداعى كونستيتۋتسيالىق كوميتەت جۇمىسىن تالقىلاۋ. مۇنىمەن قاتار، تاراپتار 2018 جىلعى مەموراندۋمنىڭ (يدليبتە دەميليتاريزاتسيالانعان اۋماق قۇرۋ تۋرالى كەلىسىم) ساقتالۋ قاجەتتىلىگىن دە نەگىزگە الماق.

وسىعان دەيىن رەسەي مەن تۇركيا قورعانىس مينيسترلەرى سوچيدە كەزدەسىپ، يدليب دەەسكالاتسيا اۋماعىنداعى احۋالدى تۇراقتاندىرۋ تۋرالى مەموراندۋمعا قول قويعان جانە يدليب دەميليتاريزاتسيالانعان اۋماعىن قۇرۋعا كەلىسكەن بولاتىن.

تاياۋدا رەسەي سىرتقى ىستەر ءمينيسترى سەرگەي لاۆروۆ ءسۇريادا قاقتىعىستار اياقتالىپ، ەل بەيبىت ومىرگە كوشتى دەپ مالىمدەگەن. دەگەنمەن، شەتەلدىك ساراپشىلار رەسەيلىكتەردىڭ بۇل «جاڭالىعىنا» سەنىم بىلدىرە قويعان جوق.

2011 جىلى ءسۇريادا قارۋلى قاقتىعىس باستالعالى بەرى استانادا ءسۇريا ماسەلەسىن رەتتەۋ جونىندەگى كەلىسسوز جەتى مارتە ۇيىمداستىرىلدى. نۇر-سۇلتان كەلىسسوزىنە قولداۋ كورسەتۋشى ەلدەردىڭ ارقاسىندا، سۇرياداعى قاقتىعىس ۋاقىتشا توقتاتىلدى. رەسەي، يران جانە تۇركيا اتالعان ماسەلە جونىندەگى كەلىسىمشارتتى ورىنداۋشى كەپىلگەر-ەلدەر سانالادى.

"The Qazaq Times"