قىرعىز پرەزيدەنتتىگىنە ۇمىتكەر سوورونباي جەەنبەكوۆ. فوتو: "تس-1"

قىرعىزستاننىڭ وش قالاسىندا سوورونباي جەەنبەكوۆ جاقتاستارى سايلاۋشىلار داۋىسىن ساتىپ الۋدا.

سوڭعى ۋاقىتتا قىرعىز ەلىندە پرەزيدەنت سايلاۋى قارساڭىندا سايلاۋشىلاردىڭ داۋىسىن ساتىپ الۋ فاكتىلەرى ءجيى تىركەلە باستادى. جاقىندا وسىنداي وقيعالاردىڭ ءبىرى وش قالاسىندا تىركەلدى. وندا  سوورونباي جەەنبەكوۆتىڭ وش قالاسى بويىنشا شاتابىنىڭ وكىلدەرى سايلاۋشىلاردىڭ ءۇيىن ارالاپ جەەنبەكوۆقا داۋىس بەرۋگە ۇگىت-ناسيحات جۇمىستارىن جۇرگىزىپ قانا قويماي، ولارعا ءوز كانديداتتارىنا داۋىس بەرگەنى ءۇشىن 1000 سوم (14 دوللار) كولەمىندە اقشا ۇسىنعان.

بۇدان بولەك بۇعان دەيىن قازان ايىنىڭ 10-ى كۇنى مەملەكەتتىك باق بەتتەرىندە سوورونباي جەەنبەكوۆتىڭ باستى قارسىلاسى ومىربەك بابانوۆتىڭ جاقتاستارى دا ءدال وسى وش قالاسىندا سايلاۋشىلار داۋىسىن ساتىپ العاندىعى جايىندا اقپارات تاراعان بولاتىن. ول كەزدە قۇقىق قورعاۋ ورگاندارى بابانوۆ شتابىندا جۇمىس ىستەيتىن ەكى ادامدى ۇستاعاندارى بەينەلەنگەن ۆيدەوروليكتە جاريالاعان. وندا وش قالاسىناداعى بابانوۆ شتابىنىڭ ەكى قىزمەتكەرىنەن داۋىس ساتىپ الۋعا ارنالعان 185 مىڭ سوم اقشا تاركىلەنگەندىگى كورسەتىلگەن. بىراق كەيىنەن ۆيدەوداعى بابانوۆ جاقتاستارىنىڭ ءبىرى تاحير قاسىموۆ جۋرناليستەر الدىندا سويلەگەن سوزىندە: «قازان ايىنىڭ 10-ى كۇنى تاڭعى ساعات 10:30 شاماسىندا ءبىز ۇگىت-ناسيحات جۇمىستارىن جۇرگىزىپ جۇرگەن جۇمىسشىلارعا ەڭبەكاقىلارىن بەرۋگە بارا جاتقانبىز. ءبىزدى «ون-ادىرعا» بارار تاس جولدا ميليتسيا قىزمەتكەرلەرى توقتاتتى. وسىدان كەيىن ءبىزدى جەرگىلىكتى ىشكى ىستەر باسقارماسىنىڭ بولىمشەسىنە الىپ باردى. ول جەردە مەن 185 مىڭ سوم اقشا جۇمىسشىلار جالاقىسى ەكەندىگىن ايتتىم. بىراق سونىڭ وزىندە ولار مەنى تۇنگى ساعات 12-گە دەيىن ۇستادى» - دەگەن. ال ونىڭ جانىنداعى ەكىنشى ادام سابىرجان ءالىموۆ ميليتسيا قىزمەتكەرلەرىنە 185 مىڭ سوم اقشانىڭ سايلاۋشىلار داۋىسىن ساتىپ الۋعا ارنالعاندىعان ايتقان. بىراق كەيىنەن ول ءوزىنىڭ بۇل ءسوزدى ميليتسيا قىزمەتكەرلەرىنىڭ قىسىم جاساۋىنان كەيىن ايتقانداعىن مالىمدەگەن.

“The Qazaq Times”