ساۋد ارابياسىنداعى كولىك جۇرگىزگىسى كەلەتىن ايەلدەر وسىعان دەيىن مۇنداي قۇقىققا يە بولا الماي كەلگەن. فوتو: Quartz.

ساۋد ارابياسىنىڭ كورولى 2018 جىلدىڭ ماۋسىمىنان باستاپ، ايەلدەرگە جۇرگىزۋشى كۋالىگىن بەرۋگە رۇقسات ەتەتىن جارلىققا قول قويدى. بۇل تۋرالى BBC-ءدىڭ ونلاين قىزمەتى حابارلادى.

وسىعان دەيىن ساۋد ارابياسى ايەلدەرگە كولىك جۇرگىزۋگە رۇقسات بەرمەگەن الەمدەگى جالعىز ەل بولىپ كەلگەن ەدى. ءتىپتى مۇنداي قۇقىققا جەتۋگە ۇمتىلعان ايەلدەردى قاماۋعا الاتىن بولعان. سوندىقتان ايەلدەردىڭ جۇرگىزۋشى كۋالىگىنە يە بولۋ ءىسى ساۋد پاتشالىعىندا كوپ جىلدان بەرى تالاستى تاقىرىپ بولدى. دەگەنمەن مىڭداعان كونسەرۆاتيۆتى دىنشىلدەردىڭ قارسىلىعىنا ۇشىراپ كەلدى.

اتالعان ەلدەگى مەملەكەتتىك رەسمي اگەنتتىكتىڭ حابارلاعانىنداي، ەندىگى جەردە «پاتشا جارلىعىمەنەن جول ەرەجەسى جانە كولىك جۇرگىزۋ قۇقىعى ەرلەر مەن ايەلدەرگە ورتاق ەتىپ بەكىتىلگەن». سونىمەن بىرگە ساۋد ارابياسىنىڭ كورولى تۇسىرگەن جارلىق بويىنشا، ەندىگى بىرنەشە قۇزرەتتى ورىندار اتالعان ءىستى قالاي جۇزەگە اسىرۋ تۋرالى قىزمەت توبىن جاساقتاپ جاتىر. جارلىق بويىنشا كەلەر جىلدىڭ ماۋسىم ايىنان باستاپ ساۋد ارابياسىنداعى ايەلدەر الەم ەلدەرىندەگى ايەلدەرگە ۇقساس كولىك جۇرگىزۋ قۇقىعىنا يە بولا الادى.

“The Qazaq Times”