فوتو: Breitbart

دونالد ترامپ اقش-تاعى يمميگرانت جاستاردى قورعايتىن باعدارلاما جۇمىسىن توقتاتۋ تۋرالى شەشىم شىعارۋى مۇمكىن. بۇل تۋرالى بارلىق اقپارات قۇرالدارىنان جيناقتالعان دەرەكتەر نەگىزىندە  ABC News حابارلادى.

باراك وبامانىڭ باستاماسىمەن 2012 جىلى 15 ماۋسىمدا قۇرىلعان باعدارلاما (Deferred Action for Childhood Arrivals نەمەسە DACA) امەريكاعا بالا كەزىندە كەلگەن زاڭسىز يمميگرانت جاستاردى 2 جىل بويى دەپورتاتسيالاۋدان قورعاپ، جۇمىس ىستەۋگە رۇقسات الۋعا كومەكتەسەدى. بۇل مەملەكەتتىك ەمەس ورگان قازىردىڭ وزىندە بەيرەسمي "ارمانشىلدار" (Dreamers) اتانعان 600 مىڭ يمميگرانت جاستى قامقورلىعىنا الىپ وتىر.

ەستەرىڭىزگە سالا كەتەيىك، ءوزىنىڭ سايلاۋالدى باعدارداماسىندا دونالد ترامپ پرەزيدەنتتىك قىزمەتكە تاعايىندالسا، باراك وباما تۇسىندا قابىلدانعان يميگرانتتارعا قاتىستى بارلىق زاڭدار مەن باعدارلامالاردىڭ (DACA-نى قوسقاندا) كۇشىن جوياتىنىن ايتقان بولاتىن.

اق ءۇيدىڭ ءباسپاسوز حاتشىسى سارا ساندەرس جۋرناليستەرگە بەرگەن سۇحباتى كەزىندە بۇل ماسەلە ءالى تالقىلاۋدا ەكەنىن جەتكىزىپ، سوڭعى زاڭدى شەشىمدى كونگرەسس قابىلدايتىنىن اتاپ ءوتتى.

2013 جىلدان باستاپ، رەسپۋبليكاشىلدار DACA-نىڭ جۇمىسىن توقتاتۋعا كۇش سالىپ كەلەدى. ماۋسىم ايىندا ون رەسپۋبليكاشىل پروكۋرور دونالد ترامپ اكىمشىلىگىنەن DACA-نى جابۋدى سۇراپ، بۇل يمميگرانتتارعا كومەك كورسەتۋ تۋرالى وسىعان دەيىن قابىلدانعان قۇجاتتارعا اسەر ەتپەيدى، تەك جاڭا قولداۋ شارالارىن جۇزەگە اسىرۋدى توقتاتۋ كەرەك دەپ مالىمدەگەن.

DACA-نىڭ قولداۋشىلارى: "اتالعان باعدارلاما قۇرىلۋى ءۇشىن يمميگرانت جاستار قالاي بەلسەندىلىك تانىتسا، ونى ساقتاپ قالۋ ءۇشىن ءبىز دە قولىمىزدان كەلگەننىڭ بارلىعىن جاسايمىز. سوتقا شاعىم تۇسىرەمىز، شەرۋگە شىعامىز", - دەدى.

“The Qazaq Times”