پرەزيدەنت: اكىمدەر بەلسەندى قيمىلداۋعا ءتيىس

اكىمدەر وڭىرلەردەگى ءوز جۇمىستارىن قايتا قاراپ، بەلسەندى قيمىلداۋعا ءتيىس. قر پرەزيدەنتى نۇرسۇلتان نازارباەۆ دامۋ باعدارلامالارىنىڭ ىسكە اسىرىلۋى جانە وڭىرلەردىڭ الەۋمەتتىك-ەكونوميكالىق دامۋ ماسەلەلەرى جونىندە وتكەن كەڭەستە وسىلاي دەدى. بۇل تۋرالى اقوردانىڭ ءباسپاسوز قىزمەتى حابارلادى. 

"يندۋستريالاندىرۋ اياسىنداعى باستى ماسەلە – ينۆەستيتسيا تارتۋ. ينۆەستورلار ءالى دە اكىمشىلىك كەدەرگىلەرگە تاپ بولۋدا. اكىمدەر وڭىرلەردەگى ءوز جۇمىستارىن قايتا قاراپ، بەلسەندى قيمىلداۋعا ءتيىس", – دەدى قازاقستان پرەزيدەنتى.

سونداي-اق پرەزيدەنت ينۆەستورلار تارتۋدا جەكەشەلەندىرۋ جوسپارىن ىسكە اسىرۋدىڭ ءتيىمدى ەكەنىن ايتىپ، قازاقستاننىڭ ءىرى كومپانيالارىن مەملەكەتكە مەيلىنشە پايدا تۇسىرمەيىنشە، اكتسيالارىن اسىعىستىقپەن ساتپاۋعا شاقىردى.

نۇرسۇلتان نازارباەۆ جۇمىسپەن قامتۋ باعدارلاماسىنىڭ تيىمدىلىگىن ارتتىرۋ قاجەتتىگىنە نازار اۋدارىپ، اكىمدەرگە وڭىرلەردە تۇراقتى جۇمىس ورىندارىن اشۋ جونىندەگى جۇمىستى جانداندىرۋدى تاپسىردى.

سونداي-اق، مەملەكەت باسشىسى بيىل جاپپاي كاسىپكەرلىكتى دامىتۋعا 37 ميلليارد تەڭگە بولىنگەنىنە قاراماستان، شاعىن نەسيە بەرۋ جۇمىستارىنىڭ باياۋ جۇرگىزىلىپ وتىرعانىن اتاپ ءوتتى.

قازاقستان پرەزيدەنتى ۇكىمەت پەن اكىمدەرگە احۋالدى تەرەڭ زەرتتەپ، اگروحولدينگتەردىڭ قارىزىنا بايلانىستى ماسەلەلەردى شەشۋ جونىندە ناقتى شارالار كەشەنىن ازىرلەۋدى تاپسىردى.

ايتا كەتەيىك، قازىرگى ۋاقىتتا اگروحولدينگتەر مەملەكەت بيۋدجەتىنەن بولىنەتىن سۋبسيديالاردى ورىنسىز جۇمساپ وتىر. جىل سايىن يگەرىلمەي قالاتىن قارجى قانشاما. ال پرەزيدەنت ولارعا قاراجاتتى ءتيىمدى جۇمساۋدى ەسكەرتۋدىڭ ورنىنا، ولاردىڭ قارىزىنا قاتىستى ماسەلەلەرىن شەشۋدى ۇسىنىپ وتىر. ال بۇدان اگروحولدينگتەر مەملەكەت قارجىسىنا ودان سايىن ماسىل بولا تۇسەتىنى بەلگىلى.

“The Qazaq Times”