فوتو: CNN

تۇركيادا وتكەن جىلى ورىن العان "مەملەكەتتىك توڭكەرىس" وقيعاسىنا ايىپتى دەپ تابىلعان 500-گە جۋىق ادام سوتقا تارتىلدى. Anadolu اقپاراتتىق اگەنتتىگىنىڭ حابارلاۋىنشا، ولارعا مەملەكەت باسشىسىنىڭ ومىرىنە قاستاندىق جاساۋعا تىرىسقانى، تەرروريستىك ۇيىممەن بايلانىسقانى، حالىققا قارسى قارۋ قولدانعانى، تۇركياعا ماتەريالدىق شىعىن كەلتىرگەنى، ت.ب. وتە كوپ كىنا ارتىلىپ، جازاسى كەسىلگەن. 

2016 جىلى تۇركيادا بولعان "مەملەكەتتىك توڭكەرىس" جاساۋعا تالپىنىس وقيعاسى كەزىندە 250-گە جۋىق ادام قازا تاپقان. ولاردىڭ باسىم كوپشىلىگى - قاراپايىم ازاماتتار. مەملەكەت باسشىسى تۇرىك حالقىنا قايعى اكەلگەن وقيعاعا اقش-تا تۇراتىن يسلام ءدىنىنىڭ ناسيحاتشىسى فەتحۋللاح گيۋلەندى سىرتتاي ايىپتاپ، ەلدەگى كەلەڭسىزدىككە قاتىسى بار ازاماتتاردىڭ بارلىعىن اباقتىعا جاۋىپ، قۋدالاۋعا ۇشىراتقان بولاتىن.

كولەمى 4 مىڭ 500 بەتتەن تۇراتىن ايىپتاۋ قورىتىندىسىنا سايكەس،  50-گە جۋىق ازامات ءومىر بويىنا باس بوستاندىعىنان ايىرىلدى. ولار - نەگىزىنەن تۇركيا پارلامەنتىن جانە پرەزيدەنت كەڭسەسى  ماڭىنداعى جولدار مەن كوپىرلەردى جارعانى ءۇشىن ايىپتالعاندار. جازاعا تارتىلعانداردىڭ قاتارىندا "مەملەكەتتىك توڭكەرىس" وقيعاسى ورىن الىپ جاتقانىن كورە تۇرا، ارەكەتسىزدىك تانىتقان گەنەرالدار مەن F-16 ۇشاعىندا تۇركيا پارلامەنتىنە شابۋىل جاساعان ۇشقىش جانە بيلىككە قارسى استىرتىن ارەكەت ۇيىمداستىرىلعان ورىن دەپ سانالاتىن اكينچي اۋە بازاسىنىڭ قىزمەتكەرلەرى دە بار.

رەسمي دەرەكتەرگە سايكەس، وسى ۋاقىتقا دەيىن، جۋرناليستەر، اسكەريلەر، وقىتۋشىلار مەن باسقا دا ماماندىق يەلەرىنىڭ وكىلى سانالاتىن 150 مىڭ ادام تۇتقىندالىپ، ونىڭ ۇشتەن ءبىرى قايتا بوساتىلعان.

“The Qazaq Times”