دەنساۋلىق ساقتاۋ ءمينيسترى دارىلەر باعاسى قالاي رەتتەلەتىنىن ايتتى

«قازاقستاندا باعا بەلگىلەۋدىڭ باقىلانبايتىن جۇيەسى، ءبىرىنشى كەزەكتە، وندىرۋشىلەردىڭ  وز دارىلەرىنىڭ كەز كەلگەن باعاسىن بەلگىلەۋ قۇقىعىنا يە بولۋىنان باستالادى. ناتيجەسىندە، كەيبىر وندىرۋشىلەردە دارىگەرلەر مەن حالىق اراسىندا دارىلەردى ساتۋ مەن ماركەتينگكە ۇلكەن بيۋدجەت ءبولۋ مۇمكىندىگى تۋىندايدى. ءدارىحانالار دا وسى دارىلەرگە كەز كەلگەن ۇستەمە باعانى بەلگىلەۋگە قۇقىلى. ءبىر قالاداعى ءدارىحانالار اراسىندا باعالاردىڭ ايىرماشىلىعى 20 پايىزعا جەتسە، نارىقتا پرەپارات تاپشىلىعى تۋىنداعان جاعدايدا ۇستەمە باعا 200 پايىزعا دەيىن دە ءوسىپ كەتۋى مۇمكىن. ەندى جاقىن ۋاقىتتا دارىلەردىڭ شەكتى باعالارىن بەلگىلەۋ بۇل جاعدايدى وزگەرتۋى مۇمكىن»، - دەدى مينيستر.

ە. ءبىرتانوۆ حابارلاعانداي، ازىرلەنگەن نورماتيۆتىك-قۇقىقتىق اكتىنىڭ جوباسىنا سايكەس ءاربىر ءوندىرۋشى وندىرىلەتىن دارىلەردىڭ قۇنىن بازيستىك جەتكىزۋ شارتىن قامتيتىن «فرانكو-زاۋىت» جاعدايلارىندا، ياعني دارىلەردىڭ قۇنىن زاۋىت اۋماعىندا تىركەيتىن بولادى.

«ءاربىر ءوندىرۋشى باعالارىن ۇسىنادى. ول ۇسىنىلعان اقپاراتتىڭ دۇرىستىعى ءۇشىن جاۋاپتى بولادى. پروتسەستىڭ كەلەسى كەزەڭىندە تىركەلگەن باعا بەكىتىلەدى، وعان تاۋاردى جەتكىزۋ، كەدەندىك رەسىمدەۋ، قاۋىپسىزدىك پەن ساپانى باعالاۋ شىعىندارى، سونداي-اق قازاقستاندا ءوندىرۋشىنىڭ جەكە زاڭدى تۇلعاسى بولعان جاعدايدا ماركەتينگتىك شىعىستار كىرەدى»، - دەدى مينيستر.

ءمينيستردىڭ سوزىنشە، ەندى تىركەلگەن باعانى انىقتاعاننان كەيىن مينيسترلىك ءدارىنىڭ شەكتى كوتەرمە ساۋدا باعاسىن جانە ەڭ جوعارى بولشەك ساۋدا باعاسىن بەكىتەدى. وسىلايشا، نارىقتاعى باسەكەلەستىكتى ساقتاۋ ماقساتىندا، مەملەكەت دارىلىك زاتتاردىڭ شەكتى باعالارىن بەلگىلەيدى، وسىعان سۇيەنە وتىرىپ، ءاربىر ديستريبيۋتور نەمەسە ءدارىحانا ءوز باعالارىن جەڭىلدىكپەن ۇسىنا الادى.

«الايدا، بۇل جۇيە قانداي دا ءبىر پرەپارات اتاۋىنىڭ تاپشىلىعى جاعدايىندا وندىرۋشىلەرگە نەمەسە ديستريبيۋتورلارعا باعانى نەگىزسىز كوتەرۋگە جانە ارتىق كىرىس الۋعا مۇمكىندىك بەرمەيدى»، - دەدى ۆەدومستۆو باسشىسى.

“The Qazaq Times”