فوتو: kapital.kz

وڭتۇستىك قازاقستان وبلىسىندا شيكىزات سەكتورىنان دايىن ءونىم سەكتورىنا ءوتۋ باعىتىندا 8 ءىرى ينۆەستيتسيالىق جوبا جۇزەگە اسىرىلىپ جاتىر. بۇل تۋرالى بۇگىن وڭىرلىك كوممۋنيكاتسيا قىزمەتىندە وتكەن بريفينگتە وبلىستىق اۋىل شارۋاشىلىعى باسقارماسى باسشىسى سەرىك تۇربەكوۆ مالىمدەدى.

ونىڭ ايتۋىنشا، وبلىستا ينۆەستيتسيا سومماسى 18,5 ملرد تەڭگەنى  قۇرايتىن، قۋاتتىلىعى جىلىنا 30 مىڭ توننا قۇس ەتىن وندىرەتىن    «اK Kazyna» جشس-ءنىڭ جوباسىن ىسكە اسىرۋ جۇمىستارى باستالعان. ال، «ورداباسى-قۇس» جشس-گى كۇركە تاۋىق ەتىن ءوندىرۋ وڭدەۋ وندىرىستىك قۋاتتىلىعىن جىلىنا 25 مىڭ تونناعا جەتكىزۋ بويىنشا كەلىسىمگە قول قويعان. مۇنان بولەك، شاردارا اۋدانىندا بالىق ونىمدەرىن قايتا وڭدەيتىن ەكى زاۋىتتى ىسكە اسىرۋ جۇمىستارى جۇرگىزىلسە، ينۆەستيتسيا سومماسى 7,8 ملرد تەڭگەنى قۇرايتىن تۇيە ءسۇتىن قايتا وڭدەيتىن زاۋىت سالۋ جۇمىستارى باستالعان.

سونداي-اق، قىتاي ينۆەستورلارىمەن ينۆەستيتسيا سومماسى 21,6 ملرد تەڭگە بولاتىن تومات زاۋىتىن سالۋ جوباسىنا كەلىسىم جاسالسا، 1 مىڭ گا اۋماققا قارقىندى جاڭعاق باۋىن وتىرعىزۋ جوباسىن جۇزەگە اسىرۋ ينۆەستورلار تاراپىنان قولداۋ كەلىسىمىن تاپتى. اتالعان جوبا بويىنشا جەردى تاڭداپ، قۇجاتتاردى راسىمدەۋ جۇمىستارى جۇرگىزىلۋدە. بۇدان باسقا، بىرنەشە ينۆەستورلاردىڭ قاتىسۋىمەن ينۆەستيتسيا سومماسى 51,2 ملرد تەڭگەگە 136 گا اۋماقتا شىمكەنت قالالىق وندىرىستىك جىلىجايلار سالۋ جوباسىن («تەپليچنىي راي») جۇزەگە اسىرۋ جوسپارلانۋدا. ال، قازىعۇرت اۋدانىندا «اسىل باستاۋ» جشس ينۆەستيتسيا سومماسى 603 ملن. تگ. قۇرايتىن قۇرعاق ءسۇت جانە سارى ماي شىعارۋ زاۋىتى سالىنۋدا.

سەرىك تۇربەكوۆ  2021 جىلعا دەيىن اگروونەركاسىپ كەشەنى ەكسپورتىنىڭ  كولەمى 35 %-عا، 90 مىڭنان استام جەكە فەرمەرلىك شارۋاشىلىقتاردى بىرىكتىرەتىن 600-دەن استام كووپەراتيۆتەر قۇرۋ جانە 118,8 مىڭ سۋارمالى جەرلەردى قالپىنا كەلتىرۋ جۇمىستارى جۇرگىزىلىپ جاتقانىن اتاپ ءوتتى.

“The Qazaq Times”