قازاقستاندا ەگىس القابى 650 مىڭ گەكتارعا ۇلعايدى

قازاقستاندا ەگىس القابىنىڭ جالپى اۋدانى 22,5 ملن گا-دى قۇرادى، بۇل وتكەن جىلمەن سالىستىرعاندا 650 مىڭ گەكتارعا ارتقان. ەگىن ەگۋ جۇمىستارىن ءارتاراپتاندىرۋ اياسىندا سۇرانىسى جوعارى داقىلداردى ەگەتىن القاپتار 1 ملن 348 مىڭ گاكتارعا ۇلعايتىلدى. بۇل تۋرالى قر اۋىل شارۋاشىلىعى مينيسترلىگىنىڭ ءبىرىنشى ۆيتسە-ءمينيسترى قايرات ايتۋعانوۆ مالىمدەدى. 

ۆيتسە-ءمينيستردىڭ سوزىنشە، جاسىمىق ەگىسىن ۇلعايتۋ قازاقستاننىڭ الەمدە اۋماق بويىنشا بەسىنشى جانە ەكسپورت بويىنشا ءتورتىنشى ورىندى يەلەنۋىنە مۇمكىندىك بەرەدى. بۇدان وزگە، بيىل قانت ءوندىرىسى ءبىر جارىم ەسەگە، مايلى داقىلدار 1,3 ەسەگە ۇلعايتىلادى دەپ كۇتىلۋدە. جۇزەگە اسىرىلىپ جاتقان ءارتاراپتاندىرۋ جۇمىستارى ءار گەكتاردىڭ تيىمدىلىگى مەن ءوندىرىستىڭ تابىسىن ارتتىرادى.

"تۇقىم شارۋاشىلىعىنا قولداۋ كورسەتۋ قاراجاتىنىڭ كولەمى وتكەن جىلمەن سالىستىرعاندا 3,3 ەسەگە ءوستى. بىرەگەي جانە ەليتالىق تۇقىمدار ءوندىرىسى قايتا قالپىنا كەلتىرىلدى جانە تۇقىم شارۋاشىلىعىنا قولداۋ كورسەتۋدىڭ وزگە دە شارالارى قابىلداندى. سونداي-اق، مينەرالدى تىڭايتقىشتاردى سۋبسيديالاۋ تەتىگىن قايتا قاراۋ ولاردى قولدانۋ كولەمىن ۇلعايتۋعا مۇمكىندىك بەردى", - دەيدى ۆيتسە-مينيستر.

سونداي-اق، ونىڭ ايتۋىنشا، كوكتەمگى ەگىس جۇمىستارىن جۇرگىزۋگە قاجەتتى ديزەلدىك وتىنعا دەگەن سۇرانىس تولىعىمەن قامتاماسىز ەتىلگەن. قر ۇكىمەتىنىڭ جازدىق ەگىس كەزەڭىندە اكتسيزدەردىڭ مولشەرلەمەسىن تومەندەتۋ تۋرالى شەشىمى ديزەلدىك وتىن باعاسىن رەسپۋبليكا بويىنشا ورتا ەسەپپەن ليترىنە 123 تەڭگەگە دەيىن تومەندەتۋگە مۇمكىندىك بەردى.

"ەگىستەردى حيميالىق وڭدەۋ بويىنشا قورعاۋ شارالارىن جۇرگىزۋ ءۇشىن ەلىمىزدىڭ وڭتۇستىك وڭىرلەرىنە قوسىمشا پەستيتسيدتەر مەن تەحنيكالار جەتكىزىلدى. 591 مىڭ گا جەر وڭدەلدى. اۋىل شارۋاشىلىعى جەرلەرىنە زاقىم كەلتىرىلگەن جوق", - دەدى قايرات ايتۋعانوۆ.

“The Qazaq Times”