فوتو: Kapital.kz

قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ كۆازيمەملەكەتتىك سەكتورداعى ساتىپ الۋ بويىنشا بولعان جەمقورلىقپەن كۇرەسۋدىڭ جولىن ۇسىندى.

ونىڭ ايتۋىنشا، قازىرگى كەزدە بۇل سەكتوردا قىلمىس سانىنىڭ ءوسۋى بايقالادى. مىسالى وتكەن جىلى ساتىپ الۋ سالاسىندا 137 قىلمىس تىركەلسە، بيىل بەس ايدىڭ ىشىندە 51 قۇقىق بۇزۋشىلىق تىركەلگەن.

"ۇلتتىق ەكونوميكانىڭ تۇراقتى دامۋىندا كۆازيمەملەكەتتىك سەكتوردىڭ ءرولى ناقتىلانعان. ال ونى ودان ارى ءتيىمدى دامىتۋ ءۇشىن جەمقورلىقپەن كۇرەسۋ كەرەك. الايدا ستاتيستيكا بۇل سەكتوردا قىلمىستىڭ كوبەيگەنىن كورسەتەدى. ونىڭ سەبەبى - بىرىڭعاي ارەكەت پەن جالپى باقىلاۋدىڭ بولماۋى", - دەيدى شپەكباەۆ.

ونىڭ سوزىنشە، كۆازيمەملەكەتتىك سەكتورداعى جاعدايدىڭ قيىنداۋى زاڭناماداعى سىبايلاس جەمقورلىق تاۋەكەلدەرىنىڭ بار ەكەندىگىن جانە ەسەپ بەرۋ مۇلدە از ەكەنىن بىلدىرەدى.

"جاعدايدى الدىن الىپ كۇرەسۋگە ەكى ساتىلى جۇيە كومەكتەسەدى. ول ساتىپ الۋلاردى زاڭدى تۇردە رەتتەيتىن  زاڭ جوباسى اياسىندا ەنگىزىلگەن. ءبىرىنشى جۇيەدە بيزنەسمەندەر ۇلتتىق كومپانيالار مەن حولدينگتەر ءاۋديتىنىڭ ىشكى قىزمەتىنە، ەكىنشى جۇيەدە قارجى مينيسترلىگىنىڭ ىشكى مەملەكەتتىك اۋديت كوميتەتىنە كىرۋىنە تۋرا كەلەدى. ال ەگەر قۇقىق بۇزۋشىلىقتار انىقتالسا ۇلتتىق كومپانيا جەتەكشىلەرى جاۋاپكەرشىلىككە تارتىلادى", - دەدى ول.

ايتا كەتەيىك، قازاقستاندا 16 سالا بويىنشا جەمقورلىقپەن كۇرەس قاتاڭداتىلىپ جاتىر. سونداي-اق، قارجى مينيسترلىگىندە وسى جىلدىڭ 1 توقسانىندا جەمقورلىققا قاتىستى 58 فاكت تىركەلگەنى جانە بۇل وتكەن جىلدىڭ سايكەس كەزەڭىمەن سالىستىرعاندا 81%-عا جوعارى ەكەنى حابارلانعان.

ەسكەرەتىن نارسە، ەلىمىزدە جىل سايىن جەمقورلىق سالدارىنان 3,8 ملرد دوللار جەلگە ۇشادى.

“The Qazaq Times”