قىرعىزستان پرەزيدەنتى قازاقستانعا قىزىعىپ قالدى

"ەگەر مەن ەكسپو ءۇشىن وسىنشا قارجى جۇمساسام مەنى ورتەپ جىبەرەر ەدى. بىزدە جول قۇرىلىسى ءۇشىن 1 ملرد دوللار قارىز الاسىڭ، سونىڭ وزىندە ءبىراز قيىندىق بولادى. مىسالى ءبىز 30 ملن دوللارعا الەمدىك كوشپەندىلەر ويىنىن وتكىزدىك. سوعان ءالى كۇنگە بۇلداناتىندار بار. ال قازاقستاندا ەكسپو-عا باسقاشا قارايدى. بۇل جەردە ادامدار بيلىكتى قولدايدى. شىنىمدى ايتايىن، قىزىعىپ وتىرمىن", - دەيدى اتامباەۆ.

ايتا كەتەيىك، ەكسپو كورمەسى 10 ماۋسىمدا جۇمىسىن باستادى. ال ءبىر كۇن بۇرىن 20 مەملەكەتتىڭ پرەزيدەنتتەرى مەن ۇكىمەت باسشىلارىنىڭ قاتىسۋىمەن سالتاناتتى اشىلۋى ءوتتى. كورمەنىڭ اشىلۋىنا المازبەك اتامباەۆ تا قاتىستى.

«استانا ەكسپو-2017» كومپانياسىنىڭ باسشىسى احمەتجانوۆتىڭ بولجاۋىنشا، ەكسپو-نىڭ قۇنى شامامەن 400 ملرد تەڭگەنى قۇرايدى. ال Forbes باسىلىمىنىڭ مالىمەتىنشە، استاناداعى ەكسپو-2017 كورمەسىنىڭ جالپى شىعىنى 3 ملرد دوللار. بۇل قازىرگى دوللار باعامىمەن - شامامەن 950 ملرد تەڭگە. قاراپ تۇرساڭىز ەسىموۆتىڭ بولجامى Forbes ۇسىنعان مالىمەتكە قاراعاندا از.