فوتو: ۆۆس

قىرعىزستاننىڭ ەكس-پرەزيدەنتى المازبەك اتامباەۆ بىشكەكتەگى تۇرمەدە اشتىق جاريالادى. بۇل تۋرالى بۇرىنعى مەملەكەت باسشىسىنىڭ ادۆوكاتى سەرگەي سلەسارەۆ حابارلادى.

«اتامباەۆتى ۇلتتىق قاۋىپسىزدىك كوميتەتىنىڭ تەرگەۋ يزولياتورىنان بىشكەكتەگى SIZO-1-گە اۋىستىردى. بۇعان قارسىلىق رەتىندە ول اشتىق جاريالادى. قازىر اتامباەۆ بۇرىن ءولىم جازاسىنا كەسىلگەندەر قاماعان جەرتولەدە جاتىر. ەكس-پرەزيدەنتتىڭ دەنساۋلىعىنا الاڭداۋشىلىق بىلدىرەمىز»، – دەدى ادۆوكات.

جەمقورلىق بابى بويىنشا سوتتالعان قىرعىزستاننىڭ ەكس-پرەزيدەنتى المازبەك اتامباەۆ پەن بىرقاتار ساياساتكەرلەر، ونىڭ ىشىندە بۇرىنعى پرەمەر-مينيستر سادىر جاپاروۆ، ءجانتورو ساتىبالديەۆ پەن ساپار يساكوۆ رەسپۋبليكادا پارلامەنتتىك سايلاۋدان كەيىن 5-6 قازاندا بولعان جاپپاي تارتىپسىزدىكتەر كەزىندە بوساتىلدى. كەيىننەن پارلامەنتتىك سايلاۋ ناتيجەلەرىن ورتالىق سايلاۋ كوميسسياسى جارامسىز دەپ تانىدى.

9 قازاندا بىشكەكتە اتامباەۆتىڭ جاقتاستارى ميتينگ وتكىزدى. ميتينگتە مالىمدەمە جاساعان اتامباەۆ ەلدە بولىپ جاتقان وقيعانى «ءۇشىنشى رەۆوليۋتسيا» دەپ اتاپ، ەكس-پرەزيدەنت سوورونباي جەەنبەكوۆتى ايىپتادى جانە جاڭا سايلاۋ وتكىزۋدى تالاپ ەتتى.

10 قازاندا ەكس-پرەزيدەنتكە قۇقىق قورعاۋ ورگاندارىنىڭ قىزمەتكەرلەرىنە كۇش قولدانۋ، جاپپاي تارتىپسىزدىكتەر ۇيىمداستىرۋ، كىسى ءولتىرۋدى ۇيىمداستىرۋ، كىسى ولتىرۋگە وقتالۋ، كەپىلگە الۋدى ۇيىمداستىرۋ، قىلمىستىق توپ مۇشەسى باتۋكاەۆتى تۇرمەدەن زاڭسىز بوساتۋ، سىبايلاس جەمقورلىق، بىشكەك جىلۋ ەلەكتر ورتالىعىن قالپىنا كەلتىرۋ كەزىندە سىبايلاس جەمقورلىق جاسادى دەگەن كۇدىكپەن قايتا قاماۋعا الىندى. سونىمەن قاتار اتامباەۆقا بىشكەكتەگى «فورۋم» وندىرىستىك توبىمەن زاڭسىز مامىلە جاساۋ، قوي-تاش كەنتى، ىستىقكول جانە جالال-اباد وبلىستارىنداعى جەردى زاڭسىز يەمدەندى دەگەن ايىپتار تاعىلعان.

"The Qazaq Times"