بىشكەكتىڭ پەرۆوماي اۋداندىق سوتىندا كريمينال ازيز باتۋكاەۆتى زاڭسىز بوساتۋ تۋرالى ىسكە سوت ۇكىمى شىعىپ، قىرعىزستاننىڭ ەكس-پرەزيدەنتى المازبەك اتامباەۆ 11 جىلعا سوتتالدى.

المازبەك اتامباەۆ سوتتا ءسوز سويلەۋدەن باس تارتتى. تالقىلاۋ بولمەسىنەن شىققاننان كەيىن سوت ەميلبەك كايپوۆ المازبەك اتامباەۆتىڭ مۇلكىن تاركىلەپ، ءوزىن 11 جىل 2 ايعا باس بوستاندىعىنان ايىردى.

بۇعان دەيىن پروكۋرورلار ونىڭ مۇلكىن تاركىلەۋمەن قاتار 15 جىلعا باس بوستاندىعىنان ايىرۋدى سۇراعان بولاتىن.

2011 جىلدان باستاپ 2017 جىلعا دەيىن قىرعىزستاندى باسقارعان ا.اتامباەۆ 8 تامىزدا قوي-تاش اۋىلىندا ورنالاسقان رەزيدەنتسياسىندا ءبىر تاۋلىككە جۋىق سوزىلعان ارنايى وپەراتسيا كەزىندە قولعا ءتۇستى. سوت ايىپتاۋلارىن مويىنداۋدان بىرنەشە مارتە باس تارتقان اتامباەۆتىڭ جاقتاۋشىلارى پوليتسياعا قارسىلىق كورسەتىپ، قاقتىعىس ورىن الدى. ارنايى جاساق ساربازى كوز جۇمدى. سول كۇنى ۇستالعان ەكس-پرەزيدەنت ۇقكد تەرگەۋ يزولياتورىنا جەتكىزىلدى.

المازبەك اتامباەۆقا قۇقىق قورعاۋ ورگاندارىنىڭ قىزمەتكەرلەرىنە قوقان-لوقى كورسەتتى، جاپپاي تارتىپسىزدىك ورناتتى، كريمينالدى توپ باسشىسى ءازيز باتۋكاەۆقا قولداۋ كورسەتتى، بىشكەك جەو قايتا قۇرۋ كەزىندە جەمقورلىق جاسادى، بىشكەكتەگى «فورۋم» ونەركاسىپ عيماراتىنىڭ باسشىلىعىمەن زاڭسىز مامىلەگە كەلدى جانە ەسىك وبلىسىنداعى قوي-تاش، ىستىقكولدە جەر ۋچاسكەلەرىن زاڭسىز جولمەن الدى دەگەن ايىپتار تاعىلعان. سونىمەن قاتار جوعارىدا اتالعان ايىپتاۋلاردىڭ ىشىندە «ەكس-پرەزيدەنت ادام ولتىرمەك بولدى جانە ادام بوپسالادى» دەگەن ءبولىم دە بار.

"The Qazaq Times"