سادىر جاپاروۆ. فوتو: ازاتتىك ۇنالعىسى

قىرعىزستاننىڭ پرەمەر-ءمينيسترى سادىر جاپاروۆ پرەزيدەنتتىك سايلاۋعا قاتىسادى. بۇل تۋرالى ول اۋدانداردىڭ بىرىنە بارعان جۇمىس ساپارى كەزىندە مالىمدەگەن.

سادىر جاپاروۆ پرەزيدەنتتىك وكىلەتتىگىنەن جەلتوقساندا باس تارتادى. ول مالىمدەمەسىندە: «10 قاڭتاردا سايلاۋ وتەدى. مەن دە وعان قاتىسامىن. سايلاۋدا جەڭىسە جەتسەم، پرەزيدەنت بولامىن، جەڭبەسەم، قاتارداعى ادام بولىپ جۇرە بەرەمىن»، – دەدى.

15 قازاندا قىرعىزستاننىڭ پرەزيدەنتى ساۋرانباي جانىبەكوۆ (سوورونباي جەەنبەكوۆ) وتستاۆكاعا كەتكەنىن جاريا ەتتى. زاڭ بويىنشا ونىڭ وكىلەتتىلىگى جوعارى كەڭەش سپيكەرىنە وتۋگە ءتيىس. الايدا، سيپكەر وكىلەتتىلىكتەن باس تارتقاندىقتان پرەزيدەنتتىڭ قۇزىرەتتى بيلىگى جاقىندا عانا تۇرمەدەن شىققان سادىر جاپاروۆتىڭ قولىنا ءوتتى.

بۇل جاعدايعا حالىقارالىق ۇيىمدار الاڭداۋشىلىق بىلدىرگەن. ەۋروپالىق وداق وكىلدەرى قىرعىزستانداعى ساياسي جاعدايعا بايلانىستى مالىمدەمەسىندە، پرەزيدەنتتىڭ وكىلەتتىلىگى جاڭادان كەلگەن پرەمەر-مينيسترگە بەرىلگەنى كۇمان تۋعىزاتىنىن ايتقان. بۇۇ تارابى دا قىرعىزستانداعى ساياسي كۇشتەردى قۇقىقتىق نورمالاردى ساقتاۋعا شاقىرعان.

14 قازاندا قىرعىزستان پارلامەنتى كەزەكتەن تىس وتىرىسىندا سادىر جاپاروۆتى ۇكىمەت باسشىسى ەتۋدى ماقۇلداعان. ول 4 قازاندا وتكەن پارلامەنتتىك سايلاۋدان كەيىنگى ەرەۋىلدەر كەزىندە تۇرمەدەن شىققان بولاتىن.

2013 جىلى قىرعىزستان بيلىگى جاپاروۆتى قۇمتور التىن كەنىشىن مەملەكەت يەلىگىنە الۋ تالابىمەن قاراقول اۋىلىندا ميتينگ ۇيىمداستىرىپ، سول كەزدەگى ىستىقكول وبلىسنىڭ اكىمىن كەپىلگە العان دەگەن ايىپپەن 2017 جىلى تامىزدا سوتتاپ، 11 جىلعا تۇرمەگە قاماعان ەدى.

"The Qazaq Times"