فوتو: afigenchik.ru

سوڭعى ۋاقىتتا كوپتەگەن حالىقارالىق ۇيىمدار الەم حالىقتارىنىڭ اراسىندا باقىت تۋرالى ستاتيستيكالىق زەرتتەۋلەر مەن ساۋالنامالار جۇرگىزىپ كەلەدى. بۇل تاقىرىپ ادامداردىڭ قانشالىقتى باقىتتى ەكەندىكتەرى مەن قوعامعا قانشالىقتى كوڭىلى تولاتىندىعىن انىقتاۋ ماقساتىندا زەرتتەلگەن بولاتىن. زەرتتەۋ ناتيجەلەرىنە سايكەس، ەڭ باقىتتى حالىقتاردىڭ رەيتينگىسىندە الەۋمەتتىك جاعدايى ورتاشادان تومەن ەلدەر كوش باستاپ تۇر. دامىعان ەلدەردەگى حالىقتىڭ الەۋمەتتىك جاعدايى ەداۋىر جوعارى بولعانىمەن، ادامداردىڭ كوبىسى ومىرگە كوڭىلى تولمايتىندىقتارىن جانە وزدەرىن باقىتتى سەزىنبەيتىندىكتەرىن ايتقان.  

ادامزات وسى ۋاقىتقا دەيىن تابا الماي كەلە جاتقان باقىتتىڭ قۇپياسىن ەڭ باقىتتى ەلدەردىڭ ءبىرى بولىپ تابىلاتىن بۋتاننان ىزدەستىرىپ كورەيىك.

فوتو: afigenchik.ru

بۋتان - باقىت مينيسترلىگى جۇمىس جاسايتىن الەمدەگى جالعىز ەل.

ۇزاق جىلدار بويى بۋتان سىرتقى الەمنەن وقشاۋ قالىپ قويعان. ەل ءۇندىستان مەن قىتايدىڭ ورتاسىنداعى گيمالاي تاۋلارىندا ورنالاسقان. نەبارى 700 000 تۇرعىنى بار. بۋتان 1971 جىلى بۇۇ-نا مۇشە بولعانعا دەيىن، ەلگە باسقا مەملەكەت ازاماتتارىنا كىرۋگە رۇقسات بولماعان. بۋتاندا تەلەۆيدەنيەنىڭ ءوزى 2002 پايدا بولعان. ال ينتەرنەت ودان دا كەيىن كەلدى. بۇنداي وقشاۋلانۋ سىرتقى ىقپالدان ساقتانا وتىرىپ، ەلدىڭ مادەني جانە ءدىني داستۇرلەرىن ساقتاۋىنا ىقپال ەتكەن.

سوڭعى زەرتتەۋلەرگە سايكەس، بۋتان الەمدەگى ەڭ باقىتتى ەل بولىپ تابىلادى. بۋتاندىقتاردىڭ 97% پايىزى وزدەرىن باقىتتى سانايتىندارىن ايتقان. بالكىم، بۇل كورسەتكىش ەلدە الەمدەگى جالعىز باقىت مينيسترلىگى جۇمىس جاسايتىقتان بولۋى مۇمكىن. بىراق بيلىككە دجيگمە كحەسارا نامگيال ۆانگچۋك كورولدىڭ كەلۋىنەن كەيىن حالىق اراسىندا «ەۋروپالىق» ءومىر سالتى كەڭ تاراعان. سوعان قاراماستان، كوپشىلىك سان عاسىرلار بويى وزدەرىن باقىتتى ەتىپ كەلگەن سالت-سانادان باس تارتقىسى كەلمەيدى.

بۋتاندىقتار سالت-ءداستۇردى مىقتى ۇستانعان. حالىق كۇندەلىكتى ۇلتتىق كيىممەن جۇرەدى. بالالاردىڭ كوبىسى رۋحاني دامۋ ءۇشىن جاستايىنان عيباداتحانالاردا ءتالىم الادى. ەلدە ەرلەر مەن ايەلدەر تەڭ قۇقىلى، ءارى دارەجەلەرى دە تەڭ. بۋتاندىقتاردا جەردىڭ ساقتاۋشىسى ايەل ادام بولىپ تابىلادى.

كۇن كورىستىڭ باستى كوزى – اۋىل شارۋاشىلىعى.

بۋتانعا كەلگىسى كەلگەن ساياحاتشىلار ەلدىڭ بيۋدجەتىنە تۇسەتىن ءبىراز اقشا تولەۋى قاجەت بولادى.

بۋتاندىقتاردىڭ باقىتىنىڭ كىلتى – سان عاسىرلىق ساباقتاستىقتى جوعالتپاي سالت-ءداستۇردى ساقتاي وتىرىپ قولدا بار قۇندىلىقتاردى قادىرلەي ءبىلۋ. ۇيرەنەرلىك دۇنيە...

“The Qazaq Times”