باقىت، ەركىندىك فوتو: muzan.ru

"باقىتتىڭ" ناقتى نە ەكەندىگىن ءالى ناقتى ەش عىلىم اشا الماعانىمەن، "باقىتتى بولۋدىڭ" ميللياردتاعان ءتاسىلى بار. بىراق ءبىر ساتتىك باقىت پەن ءومىردىڭ ءمانىن شاتاستىرىپ الماعانىڭىز ءجون. ادامدار باقىت قۋىپ كەيدە باستارىن تاۋعا دا، جارعا دا "سوعىپ" جاتادى. اقىرىندا بار تالپىنىس ەش كەتپەك. ءتىپتى تاپقان-تايانعانى باسقا كەم-كەتىگىنە كەتىپ، ورنى تولىعىپ وتىراتىنى زاڭدىلىق. سوڭىندا ءومىردىڭ قالاي ءوتىپ كەتكەنىن بايقاماي قالىپ جاتادى. ومىردە تەك اقشا مەن باقىتتىڭ سوڭىنان قۋىپ ناعىز بايلىق پەن باقىتتان قاعىلىپ قالماڭىز. سول سەبەپتى دە ءومىردىڭ ءار سەكۋندىنا ءمان بەرەتىن تومەندەگى ءبىراز كەڭەستەردى ۇسىنامىز. 

  • ۋاقىتىڭىزدى سوڭى جوق سەريالدار مەن تەلەباعدارلامالاردى كورۋگە ارناماڭىز. ءار سەرياسىنا ساعاتتارىڭىز كەتكەنىمەن، ءسىزدىڭ ءومىرىڭىز دە وسى سەريال سەكىلدى ءبىر كۇنى بىتەتىنىن ۇمىتپاڭىز.
  • ۆيرتۋالدى الەمگە قاراعاندا شىنايى ءومىر ماڭىزدىراق بولۋى كەرەك. شىنايى «وسى» الەمدە ءومىر ءسۇرىڭىز.
  • تابيعاتتىڭ، كۇننىڭ، ءاربىر ءساتتىڭ عاجايىپ كورىنىستەرىن ەستە ساقتاڭىز. اينالاڭىزعا ءمان بەرىڭىز. قارتايعان شاعىڭىزدا ەسكە الىپ وتىراتىن ەستەلىكتەرىڭىز كوپ بولسىن.
  • ءوزىڭىزدى جاعىمدى قاسيەتتەرگە باۋلىڭىز. باستىسى – دەنساۋلىعىڭىزدى كۇتىڭىز.
  • كۇن سايىن ءبىر جاڭا دۇنيەنى ءبىلىپ وتىرۋدى ادەتكە اينالدىرىڭىز. شەكسىز عالامنىڭ قۇپياسىنا ىنتىق بولىڭىز. سوندا عانا قارتايعان شاعىڭىزدا دانالىق پەن كەمەڭگەرلىككە جەتەسىز.
  • تاڭنىڭ اتۋى مەن كۇننىڭ باتۋىن باقىلاپ، ءار ءساتتىڭ ءوز كەرەمەتىن بايقاپ ۇيرەنىڭىز.
  • كۇندەلىكتى تاعىپ جۇرگەن «بەتپەردەڭىزدى» شەشىپ، شىنايى بولىڭىز. سوندا عانا شىنايى ءومىر سۇرە الاسىز. باستىسى ءوزىڭىزدى جوعالتىپ الماڭىز.
  • سەنىمسىزدىك پەن قورقىنىش ءسىزدىڭ ءومىر سۇرۋىڭىزگە ۇلكەن كەدەرگى بولىپ تابىلادى. سول سەبەپتى دە وزىڭىزگە سەنىمدى  بولعان ءجون. سونىمەن قاتار، وزىڭىزگە تىم سىن كوزبەن قاراپ، كەمسىتۋدى دوعارىڭىز. تۇيىق، وزىنە سەنىمسىز ادامدارعا ومىردە ءوز ورىندارىن تابۋ قيىنعا سوعادى.
  • كوڭىلىڭىزدىڭ تۇكپىرىندەگى پاك بالا كوڭىلىڭىزدى جوعالتىپ الماڭىز. ءومىردى شىنايى قابىلداپ، ءار ساتىنەن جاقسىلىقتاردى كورە ءبىلىڭىز. ءتىپتى شەشىلمەيتىن ماسەلە بولسا دا، ارتىنان ءبىر قايىرى بار ەكەنىن ەسىڭىزدەن شىعارماڭىز. باستىسى سەنىم مەن جاقسى ويلاۋ.
  • ۋاقىتتى باعالاپ، جاستىق شاقتا بولاشاعىڭىزدى جاساپ ۇلگەرىڭىز. تەك ىزدەنىس پەن بەينەتتىڭ ارتىندا عانا زەينەت جاتاتىنىن ەستە ساقتاڭىز.

"The Qazaq Times"