2020 جىلدىڭ 1 قاڭتارىنان باستاپ ايەلدەردىڭ زەينەت جاسى 59,5 جاسقا دەيىن ۇلعايدى. سەبەبى، بىرنەشە جىل بۇرىن قابىلدانعان زاڭ بويىنشا ولاردىڭ زەينەت جاسى جىل سايىن جارتى جىلدان ءوسىپ وتىرادى. بۇل تۋرالى بجزق حابارلادى.

وسىلايشا 2027 جىلى قازاقستانداعى ايەلدەر دە 63 جاسىندا ءوزىنىڭ جۇمىس جولىن تولىعىمەن اياقتاماق.  مۇنداي وزگەرىس قازىرگى تاڭدا 1960 پەن 1964 جىلدار ارالىعىندا تۋعان قازاقستاندىق ازاماتشالارعا قاتىستى.

بجزق تاراتقان مالىمدەمەدە: «2020 جىلدىڭ 1 قاڭتارىنان باستاپ ايەلدەر «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭنىڭ 11-بابىنىڭ 1 تارماعىنا سايكەس زەينەتكەرلىككە 59,5 جاسقا تولعاندا شىعادى. 2027 جىلى 63 جاسقا جەتكەنگە دەيىن جىل سايىن 6 ايعا ۇزارتىلىپ وتىرادى»، — دەيدى.

«Eximar» فورسايتينگ اگەنتتىگىنىڭ ديرەكتورى ايمان تۇرسىنحان ءوزىنىڭ زەينەتاقى قورى تۋرالى ويىنىڭ مۇلدە باسقاشا ەكەندىگىن ايتقان ەدى. ول سوزىندە: «زەينەتاقى قورىنداعى قارجى قاۋپى تىم جوعارى وبليگاتسيالارعا، قۇلدىراۋدىڭ الدىندا تۇرعان بانكتەرگە جانە بيۋدجەت دەفيتسيتىن جاماۋعا جۇمسالادى. سالىمشىلاردىڭ قارجىسى جۇمىس ىستەمەيدى. قوردان اقشا الاتىندار سانى بەس جىلدان بەرى ءوسىپ كەلەدى. 2015 جىلعا دەيىن زەينەتاقى قورى سالىمداردى جيناپ كەلسە، ەندى جىل سايىن قارجىنىڭ 30%-ىن جۇمسايتىن بولدى. جاڭا سالىمشىلاردىڭ كەلۋى باسەڭ. بۇل تاياۋ بەس جىلدا بجزق-نىڭ اقشاسىنىڭ تاۋسىلۋىنا اكەپ سوعادى»، — دەپ مالىمدەگەن بولاتىن.

"The Qazaq Times"