ۇلتتىق ۇلان ساربازدارى ساباق ۇستىندە.

2017 جىلعى 04 قاڭتاردا ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى اسكەري بولىمدەردە 2017 جىلعى جاڭا وقۋ كەزەڭى باستالدى. بۇل تۋرالى «وڭتۇستىك» وڭىرلىك قولباسشىلىعىنىڭ ءباسپاسوز قىزمەتى حابارلادى. 

قازاقستان حالقىنىڭ بىرلىگى مەن مەملەكەت تۇتاستىعىن نىعايتۋ جولىنداعى قازاقستان رەسپۋبليكاسىنىڭ تۇڭعىش پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆتىڭ اتقارعان ءرولى جاڭا وقۋ جىلىندا اسكەري قىزمەتشىلەرمەن وتكىزىلگەن العاشقى مەملەكەتتىك-قۇقىقتىق دايىندىق ساباعىنىڭ باستى تاقىرىبىنا اينالدى.

قولباسشىلىق باسقارماسىنىڭ وفيتسەرلەرىمەن، سونداي-اق قولباسشىلىققا باعىنىشتى اسكەري بولىمدەردىڭ اسكەري قىزمەتشىلەرىمەن جانە ساربازدارمەن العاشقى تاربيەلىك ساباقتى ۇلتتىق ۇلان باس قولباسشىسىنىڭ تەحنيكا جانە قارۋ-جاراق جونىندەگى ورىنباسارى گەنەرال-مايور ساعاتبەك نۇراحمەتوۆ جۇرگىزدى. ساباق بارىسىندا ول ەلباسىنىڭ باستاماسىمەن ەلىمىزدە ىسكە اسىپ جاتقان اۋقىمدى جوبالارمەن قاتار، مەملەكەتىمىزدىڭ وتكەن 2016 جىلعى جەتكەن جەتىستىكتەرىن، ونىڭ ىشىندە ەل تاۋەلسىزدىگىنىڭ 25 جىلدىعىنىڭ ماڭىزدىلىعىنا ەرەكشە توقتالىپ ءوتتى:

ۇلتتىق ۇلان باس قولباسشىسىنىڭ تەحنيكا جانە قارۋ-جاراق جونىندەگى ورىنباسارى گەنەرال-مايور ساعاتبەك نۇراحمەتوۆ.

- 2016 جىلعى 16 جەلتوقساندا ءبىز ۇلى قۇندىلىعىمىز – تاۋەلسىزدىگىمىزدىڭ 25 جىلدىعىن اتاپ وتتىك. بۇل ءبىزدىڭ ايتۋلى مەرەكەمىز، ويتكەنى تاۋەلسىزدىك بۇگىنگى كۇندەرى قازاقستان حالقىنىڭ جەتكەن تاريحي ۇلى جەتىستىكتەرىنىڭ ءبىرى، سوندىقتان دا ول ماڭگىلىك ەلىمىزدىڭ ماڭگىلىك سيمۆولى بولىپ قالا بەرمەك،  - دەدى ساعاتبەك تولەۋبايۇلى جانە ۇلتتىق ۇلان اسكەرىنىڭ ەلىمىزدىڭ وركەندەۋى، ءھام تىنىشتىعى جولىنداعى قوسقان ۇلەسىن دە نازاردان تىس قالدىرمادى.

مەملەكەتتىك-قۇقىقتىق دايىندىق ساباعى اياقتالىسىمەن اسكەري قىزمەتشىلەرگە «25 kz  جاڭا تاريح» اتتى مەملەكەتىمىزدىڭ قالىپتاسۋى مەن دامۋى تۋرالى دوكۋمەنتالدى فيلم كورسەتىلدى.

ۇلتتىق ۇلان ساربازدارى

العاشقى تاربيەلىك ساعاتتان كەيىن ساپتىق الاڭدا ساپ تۇزەگەن ۇلاندىقتار قارۋ-جاراق پەن اسكەري تەحنيكانى، سونداي-اق اسكەري مۇلىكتەردى دۇرىس قولدانۋ، كەز كەلگەن مىندەتتەردى اتقارۋ كەزىندە قاۋىپسىزدىك شارالارىن قاتاڭ ساقتاۋ بويىنشا تاجىريبەلىك ساباقتارعا تاراستى.

جاڭا وقۋ جىلىندا قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا ۇلاندىقتاردىڭ الدىندا كوپتەگەن اتقارىلار جاۋاپتى مىندەتتەر تۇر.  سونىڭ بىرەگەيى جاقىندا باستالاتىن 28-ءشى قىسقى ۋنيۆەرسيادا-2017, اتاپ وتكىمىز كەلەتىنى، بۇگىن وسى كولەمدى ءىس-شارادا قوعامدىق تىنىشتىقتى قامتاماسىز ەتەتىن جاس جاۋىنگەرلەر جاۋىنگەرلىك قىزمەت اتقارۋعا سالتاناتتى تۇردە كىرىسىپ كەتتى.

"The Qazaq Times"