قورعانىس ءمينيسترى رۋسلان جاقسىلىقوۆ «قازاقستان اسكەرى رەسەي شەكاراسىن قورعاۋعا بارا ما؟» دەگەن جۋرناليستەر ساۋالىنا جاۋاپ بەردى. ول قانداي دا ءبىر ەلگە بىتىمگەر كۇشتەردى جىبەرۋ بىرىككەن ۇلتتار ۇيىمى شەڭبەرىندە جۇزەگە اساتىنىن ايتتى.

– بار جاۋاپكەرشىلىكتى موينىما الا وتىرىپ، قازاقستان رەسپۋبليكاسىنىڭ قارۋلى كۇشتەرى ەل اۋماعىندا ەكەنىن مالىمدەيمىن. [اسكەر جىبەرۋ] بويىنشا قانداي دا ءبىر مىندەتتەمەلەر، بىتىمگەرشىلىك ميسسيالار بويىنشا شەشىمدەردى تەك بىرىككەن ۇلتتار ۇيىمى شەڭبەرىندە جۇرگىزەمىز. الايدا ۇقشۇ اۋماعىندا مۇنداي مىندەتتەردى ورىندامايمىز جانە ەشقايدا بارايىق دەپ جاتقان جوقپىز. ۋايىمداماساڭىزدار بولادى، ەشقايدا بارمايمىز،– دەدى جاقسىلىقوۆ.

سوڭعى ۋاقىتتار ءانونيمدى تەلەگرام ارنالاردا «قازاقستان اسكەرى ۇجىمدىق قاۋىپسىزدىك تۋرالى شارت ۇيىمى اياسىندا رەسەيدىڭ ۋكراينامەن شەكارالاس وبلىستارىنا بارادى. ماسكەۋ تاراپىنان استاناعا وسىنداي ۇسىنىس ءتۇستى» دەگەن اقپاراتتار تاراعان. ول تەلەگرام چاتتاردا قىزۋ تالقىلانعان.

رەسەي ۋكرايناعا باسىپ كىرگەلى بەرى ەلدە قازاقستان ۇجىمدىق قاۋىپسىزدىك تۋرالى شارت ۇيىمى مەن ەۆرازيالىق ەكونوميكالىق وداقتان شىعۋى كەرەك دەگەن پىكىرلەر ءجيى ايتىلۋدا.