قازاقستان رەسپۋبليكاسى ۇلتتىق ۇلاننىڭ 5573 اسكەري بولىمىندە 800 جاس جاۋىنگەر وتانعا ادال قىزمەت ەتۋگە سالتاناتتى تۇردە انت بەردى. ەلىمىزدىڭ بارلىق وبلىسىنان جاساقتالعان جاس بۋىن ەكى ايعا جۋىق ۋاقىتتا ارنايى دايىندىقتان ءوتتى، دەپ حابارلادى  ۇلتتىق ۇلان ءباسپاسوز قىزمەتى.

شاراعا اسكەردىڭ ارداگەرلەرى، اسكەري ۆەدومستۆولار مەن اتقارۋشى بيلىك ورگاندارىنىڭ وكىلدەرى، سونىمەن قاتار جاس جاۋىنگەرلەردىڭ اتا-انالارى مەن جاقىندارى قاتىستى.

ساپقا قوسىلعان جاس ساربازدار ەندى وزگە اسكەري قىزمەتشىلەرمەن بىرگە  وتانىمىزدىڭ باس قالاسى – استانانىڭ قوعامدىق ءتارتىبى مەن قاۋىپسىزدىگىن قامتاماسىز ەتۋ مىندەتتەرىن ورىندايدى.

"جاۋىنگەرلەرگە قالانىڭ 20 جىلدىق مەرەيتويىنا ارنالعان بارلىق ماڭىزدى ءىس-شارالار كەزىندە قاۋىپسىزدىكتى قاداعالاۋ مىندەتى جۇكتەلەدى. ءبىز ولارعا وسى مىندەتتەردى ادال دا ابىرويمەن اتقارادى دەپ ءۇمىت ارتامىز", - دەدى قۇتتىقتاۋ سوزىندە قۇراما كومانديرى پولكوۆنيك س. شەكاربەكوۆ.

جاس ساربازدارعا سالتاناتتى ساتتە قولداۋ كورسەتۋ ءۇشىن  ءبولىم اۋماعىنا 2500-دەن استام اتا-انا مەن تۋعان-تۋىستارى كەلدى. ولار ءوز پەرزەنتتەرىنىڭ سالتاناتتى شەرۋمەن وتكەن، وتان قورعاۋشىسى اتانعان ساتىنە كۋا بولدى.

فوتو: ۇلتتىق ۇلان ءباسپاسوز قىزمەتى

“The Qazaq Times”