الماتى قالاسىندا 14-25 جاس ارالىعىنداعى 300-گە جۋىق جاس  ونەردىڭ 17 تۇرىنەن ءوزارا باق سىنايتىن كولەمدى «الماتى قالاسى جاستارىنىڭ دەلفي ويىندارى-2017» بايقاۋى ءوز مارەسىنە جەتتى.

دەلفي ويىندارى –قاتىسۋشىلار  اراسىنان تالانتتى تۇلعالار مەن ەرەكشە دارىندى جاستاردى ىرىكتەپ الۋعا باعىتتالعان، كلاسسيكادان باستاپ قازىرگى زامانعا دەيىنگى ونەردىڭ بارلىق ءتۇرىن بىرىكتىرەتىن كەشەندى بايقاۋ.

وليمپيادا ويىندارىمەن بىرگە ەجەلگى گرەتسيا جەرىندە دۇنيەگە كەلىپ، XX-عاسىردا قايتا جاندانا باستاعان دەلفي ويىندارى بۇگىندە الەمنىڭ 100-گە تارتا مەملەكەتىندە قولداۋ تاپقان.

قازاقستان ۇلتتىق دەلفي ويىندارىن بيىل XIII-رەت وتكىزدى. ويىندار جاس تالانتتاردى تاۋىپ، ولاردى قولداۋ، وسكەلەڭ ۇرپاق اراسىندا مادەني مۇرانى ناسيحاتتاۋ، ولارعا رۋحاني، ەستەتيكالىق تاربيە بەرۋ، مادەنيەتارالىق ديالوگ پەن ۇلتتىق ونەردىڭ دامۋىنا ىقپال ەتۋدى كوزدەيدى.

بايقاۋدىڭ ناتيجەسى بويىنشا ەڭ ۇزدىك دەپ تانىلعان جەڭىمپازدار: «سكريپكا» نوميناتسياسى بويىنشا – اقىنگەر ايلين (10-15 جاس) مەن بەكتۇروۆا ماليكا (16-21 جاس), «كيىم ديزاينى» نوميناتسياسىندا پەرنەباەۆا گاۋھار، دومبىرا جانرى بويىنشا شاكەنباەۆ مۇحامەدالى (10-15 جاس) مەن جۇلەكەن جاندوس (16-21 جاس),  «ءداستۇرلى حالىق ءانى» اتالىمى بويىنشا ەرعالينا بالاۋسا، «فوتوسۋرەت» شەبەرلەرىنىڭ اراسىندا جاكاەۆا وفەليا ارنايى ماقتاۋ قاعازىمەن، باعالى سىيلىقتارمەن ماراپاتتالدى.

قيمىلىنا كوز ىلەسپەس مىڭ بۇرالعان بيشىلەردىڭ اراسىنداعى باسەكەدە باس جۇلدەنى «زاماناۋي بي» نوميناتسياسىندا «SAAD» بي توبى، «حالىق ءبيى» اتالىمىندا ءارتۇرلى جاس ەرەكشەلىكتەرىنە وراي، «سارمات» (10-15 جاس ارالىعى) پەن «نۇربي» (16-21 جاس) بي توپتارى قانجىعالارىنا بايلادى.

ەندى اتالعان جەڭىمپازداردىڭ بارلىعى قالامىزدىڭ نامىسىن - رەسپۋبليكالىق ۇلتتىق دەلفي ويىندارىندا قورعايتىن بولادى. ۇلتتىق دەلفي ويىندارىندا جەڭىس تۇعىرىنان كورىنگەن جاستار حالىقارالىق دەلفي ويىندارىندا ەلىمىزدىڭ اتىنان ونەر كورسەتەدى.

“The Qazaq Times”