ادامنىڭ ادام بولىپ قالىپتاسىپ، ومىردەن ءوز ورنىن تابۋىنا اتا-انانىڭ تاربيەسى بىردەن-ءبىر سەبەپكەر عوي. مۇنى قازاق «ۇيادا نە كورسەڭ، ۇشقاندا سونى ىلەرسىڭ» دەپ ءبىر اۋىز سوزبەن بەينەلەگەن. اكە مەن شەشەنىڭ قاس-قاباعىنان بالانىڭ بولاشاعى باستالادى. ۇيدەگى بەرەكە مەن بىرلىك، ءبىر-بىرىنە دەگەن قۇرمەت، ەرتەڭگى قۇرىلار شاڭىراقتىڭ شايقالماۋىنىڭ كەپىلى. مۇنى ءبىز ۇلتتىق ۇلاننىڭ 5571 اسكەري ءبولىمىنىڭ 3 باتالونى اۆتوموبيلدىك ۆزۆودىنىڭ كومانديرى رۋستام ماعجانۇلىمەن اڭگىمەلەسكەندە بايقادىق.
ءبىر قاراعاندا بويى كىشكەنە عانا بولىپ كورىنگەنىمەن، سۇحبات قۇرعان ۋاقىتتا كەيىپكەرىمىزدىڭ ناعىز جۇرەكتى ازامات ەكەنىن اڭعاردىق. ول تۋرالى ءسال كەيىنىرەك، ەڭ الدىمەن ومىرىنەن سىر شەرتسەك...
اعا لەيتەنانت رۋستام سەردالينوۆ 1987 جىلى رەسەي فەدەراتسياسىنىڭ قورعان وبلىسى چاستوزەر اۋدانى ليحونوۆا اۋىلىندا ومىرگە كەلەدى. مەكتەپ تابالدىرىعىن اتتاعانشا وسى اۋىلدىڭ بالالارىمەن ويناپ وسكەن ويىن بالاسى، اكە-شەشەسىنىڭ تۋعان وتانىمىزعا كوشەمىز دەگەنىن ول كەزدە جەتە تۇسىنە قويماپتى. بۇل قازاقستاننىڭ تاۋەلسىزدىك الىپ، ەتەك-جەڭىن ەندى جيناپ جاتقان 1992 جىل بولاتىن.
«اكەم، «وتانسىز ادام، ورمانسىز بۇلبۇل!»، مەنىڭ قانىم قازاق، جانىم دا قازاق. سول ءۇشىن كىندىك قانىم تامعان قورعان وبلىسىن تاستاپ، قازاق ەلىنە، اتا-بابام قاسىق قانى قالعانشا قورعاعان وتانىما ورالدىم» دەپ ءجيى ايتىپ وتىرادى دەيدى كەيىپكەرىمىز.
ساپتاس جاۋىنەگرلەرمەن بىرگە.
اتامەكەنىنە كوش تۇزەگەن رۋستامنىڭ وتباسى سولتۇستىك قازاقستان وبلىسى تايىنشا اۋدانى دراگوميروۆكا اۋىلىنا كوشىپ كەلەدى. كەلە سالا اكە-شەشەسى ءتورت بىردەي ۇلدى جەتكىزۋدىڭ قامىمەن جانتالاسىپ جۇمىس جاساپ، قازاقى ءتالىم-تاربيە بەرۋگە تىرىسادى. ايتقان ءسوز بەن اتىلعان وق نىسانادا الىس كەتپەي، ءتورت بىردەي ۇلدارى قازاقتىڭ نار تۇلعالى ازاماتتارى بولىپ ەر جەتەدى.
مەكتەپتى بىتىرىسىمەن 2004 جىلى پەتروپاۆل قالاسىنداعى ماناش قوزىباەۆ اتىنداعى سولتۇستىك قازاقستان وبلىستىق پەدوگوگيكالىق ۋنيۆەرسيتەتىنە ءتۇسىپ، اتالعان وقۋ ورنىن 2008 جىلى تامامداعان رۋستام، بالالىق ارمانى جەتەلەپ، اسكەرگە بارۋعا ۇمتىلادى. سول ارمانى ورىندالىپ، اسكەري بورىشىن وتەۋگە الماتى قالاسىنداعى 5571 اسكەري بولىمىنە سارباز بوپ كەلەدى. سارباز كەزىنەن سپورتقا دەگەن قۇشتارلىعىمەن وفيتسەرلەردىڭ كوزدەرىنە ءتۇسىپ، مەرزىمدىك اسكەري قىزمەتى بىتكەن سوڭ، كەلىسىمشارت بويىنشا وسى اسكەري بولىمىندە قىزمەتىن جالعاستىرادى.
جۇمىس ۇستەلىندە.
«مەن ءۇيدىڭ كەنجەسىمىن. مەنەن ۇلكەن ەكى اعام، جانە ءبىر مينۋتقا ۇلكەن ەگىزىم بار. سودان بولار ءۇي شارۋاسىنا كوبىنە مەن قالاتىنمىن. ۇيدە قىز بالا بولماعان سوڭ، ءۇي جيناپ ىدىس جۋ، ءتىپتى سيىرعا دەيىن ساۋىپ انامىزعا قولعابىس بولاتىنبىز. بالا كەزىمدە اكەمنىڭ اسكەردەگى سۋرەتتەرىن اعالارىممەن بىرگە كورىپ، ءبىز دە اكەمىز سەكىلدى اسكەرگە بارامىز، سولدات بولامىز دەپ ارماندايتىنبىز. اكەم ماعجان بەلورۋسسيانىڭ سلۋتسك قالاسىندا راكەتالىق اسكەرلەر قاتارىندا اسكەري بورىشىن وتەگەن. زاپاستاعى كاپيتان. بۇگىنگى تاڭدا سول بالالىق شاقتاعى ارمانىمىز شۇكىر، ورىندالىپ جاتىر. قازىرگى ۋاقىتتا ۇلكەن اعام قورعانبەك مايور، قازاقستان رەسپۋبليكاسىنىڭ باس پروكۋراتۋراسىندا قىزمەت جاسايدى، ەكىنشى اعام مايور ەربول انتاي ۇلتتىق ۇلانننىڭ «وڭتۇستىك» وڭىرلىك قولباسشىلىعىنا قاراستى 5514 اسكەري ءبولىمىنىڭ كومانديرى. مەنى ۇلتتىق ۇلان ساپىنا الىپ كەلگەن دە وسى اعام ەربول ەدى. سول كىسىنىڭ ارقاسىندا قاناتىم قاتايدى، وتانعا دەگەن سۇيىسپەنشىلىگىم ارتتى. «اعاسى باردىڭ جاعاسى بار» دەگەن ءسوز بار عوي، سول ايتقانداي اعام ماعان قامقور بولا ءبىلدى» - دەپ ۇلتتىق ۇلان قاتارىنا قالاي كەلگەندىگىن ايتىپ ءوتتى.
جاستايىنان ەركىن كۇرەسپەن شۇعىلدانعان رۋستام قازاقستان رەسپۋبليكاسىنىڭ 2-ءشى ورىن جۇلدەگەرى. وسى سپورتقا دەگەن سۇيىسپەنشىلىگىن اسكەردە دە جالعاستىرىپ كەلەدى. ۇلتتىق ۇلاننىڭ سامبودان وتكەن ىشكى بىرىنشىلىگىنىڭ 3-ءشى ورىندى جۇلدەگەرى بولسا، «وڭتۇستىك» وڭىرلىك قولباسشىلىعىنىڭ 4 دۇركىن چەمپيونى.
ماراپاتتاۋ ءساتى.
ۇلكەنگە قۇرمەت، كىشىگە ىزەت كورسەتەتىن رۋستامدى ول قىزمەت ەتەتىن اسكەري ءبولىم جەكە قۇرامىنىڭ ءبارى جاقسى سىيلاپ، قۇرمەت تۇتادى. جۇمىسىنا تياناقتى جىگىتتىڭ ءار سارباز سىرلاسى، ءتىپتى قۇرداسىنداي. ەشكىمنىڭ الا ءجىبىن اتتاماي، وتان الدىنداعى قىزمەتىن ابىرويلى اتقارىپ جۇرگەن رۋستام ۇلتتىق ۇلاننىڭ ۇلانى، قازاق ەلىنىڭ قىرانى دەپ اۋىز تولتىرىپ ماقتانۋعا ابدەن لايىقتى ازامات، جۇرەكتى ساردار. جۇرەكتى دەيتىنىمىز، ول 2015 جىلدىڭ اياعىندا قوعامدا الەۋمەتتىك رەزونانس تۋدىرعان الماتى وبلىسىنىڭ ىلە اۋدانى جەتىگەن كەنتىندە جوعالىپ كەتكەن 20 جاسار قىز ايزادا اۆلاتاروۆانى تابۋعا ۇلكەن سەپتىگىن تيگىزدى. رۋستام جەتەكشىلىك جاساعان اسكەري جاساق قۇرامى قاپشاعاي قالاسى ساياجايلارىنىڭ ماڭىنان جاس قىزدى تاۋىپ، امان-ەسەن تۋعاندارىنا قايتارادى، ال بۇزاقى قىلمىسكەردى سول ارادا قۇرىقتايدى. وسى باتىل ءىس-ارەكەتتەرىنىڭ ارقاسىندا ونىڭ ەسىمى ەلگە تانىلادى. ول تۋرالى رەسپۋبليكالىق، وبلىستىق باق قۇرالدارى جارىسا جازىپ جاتتى. رۋستامنىڭ قىراعى قىزمەتى ەلەۋسىز قالمادى، باتىلدىعى ءۇشىن ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ جەكە قۇرامى وعان قۇرمەت كورسەتتى، سونىمەن قاتار قازاقستان رەسپۋبليكاسىنىڭ ىشكى ىستەر ءمينيسترى قالمۇحانبەت قاسىموۆتىڭ بۇيرىعىمەن وعان كەزەكتەن تىس «اعا لەيتەنانت» اسكەري شەنى بەرىلدى.
«اكە كورگەن وق جونار» دەگەن ۇلاعاتتى ءسوز بار عوي، سول سەكىلدى رۋستام دا، ونىڭ اعالارى دا اكەسىنىڭ اسكەري جولىن جالعاستىرىپ كەلەدى، ياعني بۇل وتباسىن اسكەري ديناستيا دەپ تە اتاۋعا بولادى. ول تۋرالى رۋستام:
«اكە بالاعا ارقاشان ۇستاز، باعدارشام عوي. اكەمنىڭ سول ءبىر اسكەردەگى سۋرەتى ءبارىمىزدى اسكەري ادام بولۋعا، وتاندى سۇيۋگە مۇرىندىق بولدى. سول اسكەري سۋرەت مەنىڭ بولاشاعىمدى ايقىنداپ بەرگەندەي سەزىنەم بۇل كۇنى. ەندىگى اكەمنىڭ سارا جولىن، اعالارىمنىڭ ءىزىن جالعاپ قىزمەتتە جەتىستىكتەرگە جەتۋ - بۇگىنگى العا قويعان ماقساتىم. مەن دە اكەم سەكىلدى ۇرپاققا تاربيە بەرگىم كەلەدى».
"اكەم سەكىلدى ەل قورعانى بولامىن".
ءسوز سوڭىندا ءوزىنىڭ ۇلتتىق ۇلان قاتارىندا قىزمەت ەتەتىنىن ماقتان تۇتاتىن رۋستام: «مەن ءۇشىن باستى مىندەت – وتانىما قالتقىسىز ادال قىزمەت ەتۋ، ءوزىم وسى ۇلتتىق ۇلان قاتارىندا سارباز، ودان كەلىسىمشارت بويىنشا اسكەري قىزمەتشى بولا ءجۇرىپ وفيتسەرلىك لاۋازىمعا دەيىن كوتەرىلدىم، بۇل ماعان كومانديرلەر مەن باستىقتاردىڭ ۇلكەن سەنىم ارتۋى دەپ بىلەمىن. ەلىمنىڭ قاۋىپسىزدىگىن قامتاماسىز ەتۋگە تيتتەي دە بولسا ۇلەس قوسۋ مەن ءۇشىن ۇلكەن مارتەبە، بۇدان كەيىن دە قىزمەتتىك-جاۋىنگەرلىك مىندەتتەرىمدى ابىرويمەن اتقارۋعا، ەل سەنىمىن اقتاۋعا ءسوز بەرەمىن!» – دەپ، اعىنان جارىلدى.
بۇگىنگى كۇندە رۋستام ءسۇيىپ قوسىلعان جارى اليامەن ءبىر شاڭىراقتا تاتۋ-ءتاتتى ءومىر سۇرۋدە، اجار ەسىمدى قىزدارىن تاربيەلەۋدە.
لەيتەنانت ايدوس بايشاعىروۆ، ۇلتتىق ۇلاننىڭ «وڭتۇستىك» وڭىرلىك قولباسشىلىعى.
وتانعا ورالعان قانداس بەيىمدەلۋى نەمەسە قانداستار مەن قازاقستانداعى ميگرانتتاردى اقپاراتتىق قولداۋ جانە الەۋمەتتىك بەيىمدەۋدىڭ مەديا-ستراتەگياسى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
مەشىن جىلدىڭ قارا ولەڭى
نازارباەۆ "قۇرمەتتى سەناتور" اتاعىنان ايىرىلدى
موڭعوليا استاناسىندا جاپپاي نارازىلىق شەرۋلەرى ءوتتى