Äzerbayjan prezidenti Il'ham Älievtiñ soñğı mälimdemeleri Reseyge qatıstı bwrınğı diplomatiyalıq saqtıqtan bas tartıp, aşıq qarsılıqqa köşkenin añğartqanday. Bügin Äliev ukrain jurnalisi Dmitriy Gordonnıñ swrağına qaytarğan jauabı men Reuters-ke bildirgen mälimdemesi sonıñ körsetedi.

Prezident Äliev Ukrainağa: "Okkupaciyağa eşqaşan könbeñder. Aumaqtıq twtastıqtı bwzğandarğa eşqaşan berilmeñder" dedi.

Bwl Kreml' üşin tikeley eskertu. Äzerbayjannıñ özi de keşe ğana Armeniyamen şekaradağı dauların Reseydiñ aralasuınsız şeşken.

Bwğan negizgi türtki bolğan Aqtau mañındağı wşaq oqiğası:

Äliev Reseydiñ ünsizdigine narazı ekenin alğaş ret aşıq ayttı. 2024 jıldıñ soñında Aqtau mañında Äzerbayjanğa tiesili AN-74 wşağı qwlap, wşaqtağı adamdardıñ birazı qaza tapqan bolatın. Äzerbayjan tjağınıñ dereginşe, wşaq Resey tarabınan atılğan.

Äliev bügin Reuters-ke: "7 ay küttik. Resey ünsiz otır. Biz artıq eşnirse swrap otırğan joqpız. Bar bolğanı, kinäni moyındap, ayıptılardı jazalap, qaza tapqandardıñ otbasına ötemaqı tölesin dedik. Onı da istemey otır. Endi sottasamız. Biz bwl oqiğanı wmıtpaymız", – dedi.

Bwl mälimdeme de – Kreml'ge bağıttalğan qatañ signal.

Al, bwğan Reseydiñ körsetetin reakciyası tömendegidey boluı mümkin:

  1. Ädettegi "ünsizdik taktikası" jalğasuı mümkin
    Kreml' köbine dostastıq keñistigindegi (TMD) elderdiñ narazılığına jauap bermey, ünsiz qaludı jön köredi. Äzerbayjannıñ mälimdemesine de osılay etui ıqtimal. Bwl – şielenisti uşıqtırmaudıñ, biraq eşnärse moyındamaudıñ amalı.
  2. Mäskeu "dostıq ritorikasın" saqtap qaluğa tırısadı
    Resey üşin Äzerbayjan – Oñtüstik Kavkazdağı strategiyalıq oyınşı. Kreml' jağı Kavkazda Türkiyanıñ ıqpalınıñ artuınan qorqadı, sondıqtan Älievpen qarım-qatınastı mülde üzip tastau Mäskeuge tiimsiz.
  3. Jauap berudiñ rımın jasaydı
    Resey sırtqı ister ministrligi nemese qorğanıs ministrligi ayasında tömen deñgeydegi resmi twlğalar tüsinikteme berui mümkin. Bwl – jauap berdik dep körsetu, biraq jağdaydı salqındatu ädisi.
  4. Äzerbayjanğa qısım küşeytu
    Ekonomikalıq nemese aymaqtıq qısım küşeyui mümkin. Mısalı, Resey Äzerbayjan önimderine uaqıtşa tosqauıl qoyuı bolmasa Armeniya jağın basa qoldauı mümkin.

Äliev nege batıl söyledi?

  1. Türkiyanıñ artındağı sayasi qoldau
    Äzerbayjannıñ soñğı jıldardağı negizgi tiregi – Türkiya. Äliev Mäskeuge qarsı aşıq mälimdemeler jasağanda, Ankaranıñ qoldauı bar ekenin biledi.
  2. Reseydiñ älsireui
    Ukrainadağı soğıstıñ wzaqqa sozıluı Reseydiñ bwrınğı aymaqtıq üstemdigin älsiretti. Onı Äzerbayjan da, Ortalıq Aziya elderi de bayqap otır.
  3. Wlttıq bedeldi saqtau
    Aqtaudağı wşaq oqiğasına ünsiz qalu Äliev üşin işki sayasatta abıroysızdıq bolar edi. Halıqqa "biz kek qaytaramız" nemese "ädildikke qol jetkizemiz" dep körsetu – sayasi wpay jinaudıñ amalı.

Bwnıñ geosayasi saldarı qanday boluı mümkin?

  • Kavkazdağı köppolyarlı oyın küşeyedi

Äzerbayjan Reseyden alıstay otırıp, Türkiya, Qıtay jäne Batıspen teñgerimdi sayasat jürgizuge köşip baradı.

  • Reseydiñ ıqpalı kemidi

Älievtiñ bügingi sözi – Oñtüstik Kavkazda Reseydiñ rölin şekteytin tağı bir qadam.

  • Ukraina mäselesinde precedent qalıptastı

Älievtiñ «okkupaciyağa könbeñder» degen sözi – postkeñestik elderge bağıttalğan ündeu. Al bwnıñ Kreml'ge wnamaytını anıq.

Äzerbayjan prezidenti Il'ham Äliev Kreml'ge diplomatiyalıq twrğıda «qattıraq söyleu» sayasatına köşti. Bwl Oñtüstik Kavkazdağı geosayasi oyınnıñ jaña kezeñin bastaytın belgi. Reseydiñ jauap nwsqaları köp, biraq Mäskeudiñ ünsiz qala berui nemese tömen deñgeyde ğana jauap berui äbden mümkin. Degenmen, Älievtiñ bügingi sözi postkeñestik keñistikte Mäskeuden qorıqpaytın jaña ritorika däuiriniñ bastalğanın körsetti.

The Qazaq Times