Almatıda №652 uçaskesi 1999 jılı qaytıs bolğan Abdurahman Almasovtıñ atına AES referendumına qatısuğa şaqırtu jibergen. Bwğan şağınğan Arzu Almasova marqwm äkesiniñ ölimi turalı akti bolğanına qaramastan, tiriler qatarında dauısı qağaz jüzinde qoldanğan dep küdiktenedi.

Almasova jelidegi paraqşalarındağı ömirde joq adamğa joldanğan resmi şaqırtu turalı sını jartı milionnan asa qaralğan. Ol özine Naurızbay audanı äkimdiginen bir top baylanısqa şığıp, video jazbanı öşirudi ötingenin aytadı.

№652 uçaske Almatı qalası Naurızbay audanında Seydildä Köpbaev atındağı №186 orta mektepte ornalasqan.

– Mağan ğana emes, 25 jıl bwrın äkeme şaqırtu qağaz keldi. Men post jariyalağannan keyin belgili bolğanı äkemi äli tiriler qatarında jür eken. Äkemniñ 99-şı jılı ölimi turalı akti qwjatı qolımızda, sol arqılı mirasqorlıqpen üydi öz atıma ötkizgenmin. Demek 25 jıldan beri dauısın da berip jür, Qazaqstan halqınıñ sanına kirip twrğan azamat bolıp esepteledi. Jelidegi jariya şağımımnan keyin mağan «tehnikalıq qatelik tüzetilip, tiriler tiziminen alınıp, ölgender qatarına engizildi» degen qağaz berdi. ...Sonda äkem osınşama uaqıt tiriler qatarında jeñildik boldı ma, qanşama saylau, sanaqta esepke alındı ma? Talabım – resmi bazada küni keşe qaytıs bolğan dep engenin tüsindirip bersin, –  deydi Arzu Almasova.

Marqwmnıñ atına qol qoyıp, şaqırtu joldağan №652 uçaskesiniñ komissiya törağası, AMANAT partiyasınıñ müşesi, pedagog Abay Sauıtov Saparğali QT tilşisiniñ swrağına jauap üzildi-kesildi beruden bas tarttı.

Jauap ala almağandıqtan, Almatı qalasınıñ Aumaqtıq referendum komissiyasına jügindik. Resmi aqparatta ARK Almasovtar otbasınan jağdayğa baylanıstı keşirim swrağanı jazılğan. Sonımen qatar, jelidegi jariya şağım qazaqşa bolğanımen, jauabın orısşa bergen Naurızbay audandıq ARK törayımı Külbala Samıkenovanıñ sözin audarıp bergen.

«Saylauşılardıñ tizimderi jeke twlğalar turalı memlekettik derekter bazası negizinde qalıptastırıladı. Bwğan deyin A. Almasov Almatı oblısınıñ «Krasnıy Vostok» auılında tirkelip, 2014 jılı Almatı qalasına qosılıp, Aqjar şağın audanı bolıp özgertilgen bolatın.

Tehnikalıq qatelik derekterdiñ memlekettik organdarmen uaqıtılı özgermeuine jäne keyin Almatı qalasınıñ derekqorımen biriktirilmeuine baylanıstı bolğan» , – delingen qalalıq ARK baspasöz qızmeti joldağan resmi tüsindirmede.

Almatı q. Naurızbay audanınıñ ARK (TIK - orısşa) qazaqşa şağımğa orısşa jauabı. Foto: Almasovtar otbasınan

Almatı q. Naurızbay audanınıñ ARK (TIK - orısşa) qazaqşa şağımğa orısşa jauabı. Foto: Almasovtar otbasınan

Dese de däl osı mazmwndağı orısşa hattı qolına alğan Almasova äkesiniñ dauısı qoldı bolıp kelgeninen küdiktenedi. Onıñ jelidegi osı tağırıptağı jazbalarınan ondağan qoldanuşınıñ osığan wqsas jağdayğa wşırasqanı turalı pikirler köruge boladı. Derekqordağı mälimetterdiñ der kezinde integraciyalanuına jauaptı mamandarğa osınday jağdayda qanday şara köriletini belgisiz.

Ortalıq referendum komissiyasınıñ törağası Nwrlan Äbdirov aldın ala qorıtındı boyınşa, elde dauıs beruge qwqılı 63,66% adam qatısqanın, al Almatı qalasınıñ körsetkişi 25, 21% bolğanın mälimdegen. Täuelsiz baqılauşılardıñ balama mälimetine qarağanda, almatılıqtardıñ 16%-ı ğana byulleten' alğan.

The Qazaq Times