Körneki suret. Foto: Timur Batırşin

Qazaqstanda koronavirus pen oğan wqsas pnevmoniyağa şaldıqqandar sanı şamamen 8,1 mıñğa artıp, jalpı esebi 729 mıñnan astı. Tek şilde ayında 154 mıñ adam sırqattanıp, 1932 adam (KVI+ 1644, KVI- 288) qaytıs bolğan. Şilde ayınıñ ortasına qaray täuliktik körsetkişi 5 mıñnıñ üstine şıqqan indettiñ törtinşi tolqınında qazir keminde 7 mıñ jağday tirkelip jatır. Tamız ayınıñ alğaşqı dekadasında 80 mıñnan asa sırqat tirkelip, 1,4 mıñday adam köz jwmdı.

Densaulıq saqtau ministrliginiñ resmi mälimetinşe, elde 11 tamızda koronavirus (KVI+) jwqqan 7747 adam, al 10-ı küni  koronavirus pnevmoniyasına (KVI-) şaldıqqan 427 adam tirkeldi jäne apta basında 129 qazaqstandıq aurudan qaytıs boldı. Qazir elde 113 mıñnan asa adam (KVI+ boyınşa 109 mıñ, KVI- boyınşa 4 mıñ) auırıp jatır.

#COVID  Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey mıñnan joğarı dinamikada twrğan Almatı (1510) jäne astana (1384) qalalarınan. Bwdan özge Qarağandı (1127), Şımkent (515), Atırauda (460) epidahual tipti naşarlay tüsken. Aqtöbe (364), Almatı (300), Pavlodar (297), Aqmola (276), Qostanay (264), ŞQO (244), Mañğıstau (218), Qızılorda (204), BQO (169), SQO (159), Jambıl (135), Türkistan (121)  oblıstarında dert üdep twr. Osı särsenbide aurudan ayıqqan 7512 adam üyine şığarılğan. Seysenbide jiını 105 adam qaytıs bolğan.

#COVID_pnevmoniyası Tamızdıñ 10-ı, seysenbide aqparatı bir täulikke keşigip beriletin koronavirus pnevmoniyasına şaldıqqan 427 nauqas esepke alındı. Vedomstvo dereginşe, seysenbi küni sırqattar Şımkent (125) qalası jäne Jambıl (49), Mañğıstau (47), Atırau (42), Almatı (30) oblıstarında köptep anıqtalğan. Sonımen qosa, 221 adam ayığıp şıqqan, tağı 24 adam köz jwmğan.

#Jalpı  DenMin deregine qarağanda, emdelip jatqan 113 mıñ nauqastıñ 30 mıñı auruhanada, 82 mıñı ambulatorlıq baqılauda. 1849 nauqastıñ jağdayı naşar, ondağı 479 adamnıñ häli öte auır. Bwdan özge 215 sırqat ökpeni jasandı jeldetu apparatımen tınıstap jatır.

Epidkartada Qazaqstannıñ barlıq öñiri twtastay «qızıl aymaqta» twr.

DenMin habarınşa, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 664 mıñnan, 1 tamızdan bılayğı koronavirus pnevmoniyası 64 mıñnan asqan. DDSW derekqorı men Wlttıq statistikada Qazaqstanda auırğandar sanı 729 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 13,8 mıñ adam (KVI+ / U07.1 – 7208, KVI- / U07.2 – 3973, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 41-orınğa ornıqtı.

Ükimettiñ soñğı deregine qarağanda, Qazaqstanda 4,5 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 5,9 mln şamasında.

"The Qazaq Times"