Almatı qalasında koronavirusqa şaldıqqandardı emdeuge arnalğan Ortalıq klinikalıq auruhananıñ palatasındağı nauqastar men däriger. 15 şilde 2021 jıl. Foto: QT / Kültegin Aspanwlı

On kün 5 mıñnan tirkelgen nauqastardıñ kündelikti esebi 23 şildede 6,7 mıñğa köbeydi. Eşbir öñirde jüzden kem jağday tirkelmegen, barlıq aymaqta eleuli ösim bayqaladı. Törtinşi tolqınnıñ ötindegi osı aptada üşinşi antirekord orın aldı. Qazir 75 mıñnan astam sırqat emdelip jatır. 

Densaulıq saqtau ministrliginiñ resmi mälimetinşe, elde 23 şildede koronavirus (KVI+) jwqqan 6521 adam, al 22-si koronavirus pnevmoniyasına (KVI-) şaldıqqan 225 adam tirkeldi. Qazir elde 75 mıñ adam (KVI+ boyınşa 73 mıñ, KVI- boyınşa 1914) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey astana (1522),  Almatı qalası (1080) jäne Qarağandı oblısında (750) tirkeldi. Bwdan özge Şımkent (507), Atırau (446), BQO (309), Mañğıstau (255), Aqtöbe (250), Almatı (220), Pavlodar (211), Aqmola (193), Qızılorda (170), Qostanay (167),  SQO (123), Türkistan (109), Jambıl (108), Şığıs Qazaqstan (101) oblıstarında dert üdep twr. Ötken täulikte 2802 adam ayığıp üyine şığarılğan. Beysenbide jiını 64 adam qaytıs bolğan.

#COVID_pnevmoniyası 22 şildede aqparatı bir täulikke keşigip beriletin koronavirus pnevmoniyasına şaldıqqan 225 nauqas esepke alındı. Vedomstvo dereginşe, sırqattar astana, Şımkent qalaları men Jambılda (ärqaysında 32-den), Atırau (27), Almatı jäne Mañğıstau oblıstarında (ärqaysında 18-den), ŞQO (12), Aqtöbe (10) öñirinde köptep anıqtalğan. Sonımen qosa, 86 adam ayığıp şıqqan, tağı 10 adam köz jwmğan.

#Jalpı  DenMin deregine qarağanda, emdelip jatqan 75 mıñnan asa nauqastıñ 21,6 mıñı auruhanada, 53 mıñı ambulatorlıq baqılauda. 1325 nauqastıñ jağdayı naşar, ondağı 287 adamnıñ häli öte auır. Bwdan özge 175 sırqat ökpeni jasandı jeldetu apparatımen tınıstap jatır.

Virustıñ taralu qateri jağınan respublikanıñ barlıq öñiri sarğayıp-qızara tüsti. «Qızıl aymaqqa» engen öñirler: astana, Almatı, Şımkent qalaları men Almatı, Aqmola, Atırau, Aqtöbe,  BQO, Qarağandı, Mañğıstau, Qostanay, Qızılorda, SQO, Pavlodar, ŞQO, Jambıl oblıstarı. Al Türkistan öñiri jalğız «sarı aymaqta» twr. Qazaqstan twstas qızıl reñge boyaldı.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan. Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 522 mıñğa, 1 tamızdan bılayğı koronavirus pnevmoniyası 59 mıñğa jetti. DDSW derekqorı men Wlttıq statistikada Qazaqstanda auırğandar sanı 582 mıñnan astı. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 11 270 adam (KVI+ / U07.1 – 5308, KVI- / U07.2 – 3595, ilespe aurulardan – 2367) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 42-orında twr.

Ükimettiñ soñğı deregine qarağanda, Qazaqstanda 3 mln 170 mıñ adam koronavirusqa qarsı vakcinanı tolıq alğan.

"The Qazaq Times"