الماتى قالاسىندا كوروناۆيرۋسقا شالدىققانداردى ەمدەۋگە ارنالعان ورتالىق كلينيكالىق اۋرۋحانانىڭ پالاتاسىنداعى ناۋقاستار مەن دارىگەر. 15 شىلدە 2021 جىل. فوتو: QT / كۇلتەگىن اسپانۇلى

ون كۇن 5 مىڭنان تىركەلگەن ناۋقاستاردىڭ كۇندەلىكتى ەسەبى 23 شىلدەدە 6,7 مىڭعا كوبەيدى. ەشبىر وڭىردە جۇزدەن كەم جاعداي تىركەلمەگەن، بارلىق ايماقتا ەلەۋلى ءوسىم بايقالادى. ءتورتىنشى تولقىننىڭ وتىندەگى وسى اپتادا ءۇشىنشى انتيرەكورد ورىن الدى. قازىر 75 مىڭنان استام سىرقات ەمدەلىپ جاتىر. 

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 23 شىلدەدە كوروناۆيرۋس (كۆي+) جۇققان 6521 ادام، ال 22-ءسى كوروناۆيرۋس پنەۆمونياسىنا (كۆي-) شالدىققان 225 ادام تىركەلدى. قازىر ەلدە 75 مىڭ ادام (كۆي+ بويىنشا 73 مىڭ، كۆي- بويىنشا 1914) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي استانا (1522),  الماتى قالاسى (1080) جانە قاراعاندى وبلىسىندا (750) تىركەلدى. بۇدان وزگە شىمكەنت (507), اتىراۋ (446), بقو (309), ماڭعىستاۋ (255), اقتوبە (250), الماتى (220), پاۆلودار (211), اقمولا (193), قىزىلوردا (170), قوستاناي (167),  سقو (123), تۇركىستان (109), جامبىل (108), شىعىس قازاقستان (101) وبلىستارىندا دەرت ۇدەپ تۇر. وتكەن تاۋلىكتە 2802 ادام ايىعىپ ۇيىنە شىعارىلعان. بەيسەنبىدە جيىنى 64 ادام قايتىس بولعان.

#COVID_پنەۆمونياسى 22 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 225 ناۋقاس ەسەپكە الىندى. ۆەدومستۆو دەرەگىنشە، سىرقاتتار استانا، شىمكەنت قالالارى مەن جامبىلدا (ارقايسىندا 32-دەن), اتىراۋ (27), الماتى جانە ماڭعىستاۋ وبلىستارىندا (ارقايسىندا 18-دەن), شقو (12), اقتوبە (10) وڭىرىندە كوپتەپ انىقتالعان. سونىمەن قوسا، 86 ادام ايىعىپ شىققان، تاعى 10 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 75 مىڭنان اسا ناۋقاستىڭ 21,6 مىڭى اۋرۋحانادا، 53 مىڭى امبۋلاتورلىق باقىلاۋدا. 1325 ناۋقاستىڭ جاعدايى ناشار، ونداعى 287 ادامنىڭ ءحالى وتە اۋىر. بۇدان وزگە 175 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ۆيرۋستىڭ تارالۋ قاتەرى جاعىنان رەسپۋبليكانىڭ بارلىق ءوڭىرى سارعايىپ-قىزارا ءتۇستى. «قىزىل ايماققا» ەنگەن وڭىرلەر: استانا، الماتى، شىمكەنت قالالارى مەن الماتى، اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار، شقو، جامبىل وبلىستارى. ال تۇركىستان ءوڭىرى جالعىز «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 522 مىڭعا، 1 تامىزدان بىلايعى كوروناۆيرۋس پنەۆمونياسى 59 مىڭعا جەتتى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 582 مىڭنان استى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 11 270 ادام (كۆي+ / U07.1 – 5308, كۆي- / U07.2 – 3595, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 42-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 3 ملن 170 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"