Auruhanadan şığıp bara jatqan jedel järdem köligi. Almatı qalasınıñ 5 klinikalıq auruhanası. Foto: QT / Kültegin Aspanwlı

Karantin küşeygen köktemnen keyin jazğıtwrı indet qarqını birşama basılıp, şildege qaray qayta üdey bastadı. Bir täulikte 2,5 mıñnan asa sırqat anıqtalıp, otız şaqtı adam qaytıs bolğan.

Densaulıq saqtau ministrliginiñ resmi mälimetinşe, elde 30 mausımda koronavirus (KVI+) jwqqan 2436 adam, al 29-ı koronavirus pnevmoniyasına (KVI-) şaldıqqan 88 adam tirkeldi. Qazir elde 26 mıñnan asa adam (KVI+ boyınşa 24 802, KVI- boyınşa 1320) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey astana (807),  Qarağandı oblısı (394) jäne Almatı qalasında (305) tirkeldi. Bwdan özge Şımkent (143), BQO (121), Atırau (98), Mañğıstau (81), Şığıs Qazaqstan (78) oblıstarında dert üdep baradı. Ötken täulikte 1134 adam ayığıp şığıp, üyine jiberilgen. Osı seysenbide jiını 26 adam qaytıs bolğan.

#COVID_pnevmoniyası 29 mausımda aqparatı bir täulikke keşigip beriletin koronavirus pnevmoniyasına şaldıqqan 88 nauqas esepke alındı. Vedomstvo dereginşe, olar Almatı jäne Mañğıstau oblıstarında (ärqaysında 11-den), astanada (8), Atırau, Jambıl, Qostanay oblıstarı men Şımkent qalasında (ärqaysında jeti-jetiden) anıqtalğan. Sonımen qosa, 61 adam ayığıp şıqqan, tağı 3 adam köz jwmğan.

#Jalpı  DenMin deregine qarağanda, emdelip jatqan 26 122 nauqastıñ 7,7 mıñı auruhanada, 18 mıñı ambulatorlıq baqılauda. Ahualı naşar 488 nauqastıñ jağdayı naşar, ondağı 103 adamnıñ häli öte auır. Bwdan özge 68 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan astana, Almatı, Şımkent qalaları men Atırau, BQO, Qarağandı oblıstarı «qızıl aymaqqa» endi. Aqmola, Aqtöbe, Qostanay, Mañğıstau, Pavlodar öñirleri «sarı aymaqta» twr. Qazaqstan twstas qızıl reñge boyaldı.

Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 425 mıñğa, 1 tamızdan bılayğı koronavirus pnevmoniyası 57 mıñğa jetken. DDSW derekqorı men Wlttıq statistikada Qazaqstanda auırğandar sanı 482 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 9,7 mıñı (KVI+ / U07.1 – 4375, KVI- / U07.2 – 3449, ilespe aurulardan – 1962) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 45-orında twr.

Ükimettiñ soñğı deregine qarağanda, Qazaqstanda 2 mln 40 mıñday adam koronavirusqa qarsı vakcinanı tolıq alğan.

"The Qazaq Times"