اۋرۋحانادان شىعىپ بارا جاتقان جەدەل جاردەم كولىگى. الماتى قالاسىنىڭ 5 كلينيكالىق اۋرۋحاناسى. فوتو: QT / كۇلتەگىن اسپانۇلى

كارانتين كۇشەيگەن كوكتەمنەن كەيىن جازعىتۇرى ىندەت قارقىنى ءبىرشاما باسىلىپ، شىلدەگە قاراي قايتا ۇدەي باستادى. ءبىر تاۋلىكتە 2,5 مىڭنان اسا سىرقات انىقتالىپ، وتىز شاقتى ادام قايتىس بولعان.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 30 ماۋسىمدا كوروناۆيرۋس (كۆي+) جۇققان 2436 ادام، ال 29-ى كوروناۆيرۋس پنەۆمونياسىنا (كۆي-) شالدىققان 88 ادام تىركەلدى. قازىر ەلدە 26 مىڭنان اسا ادام (كۆي+ بويىنشا 24 802, كۆي- بويىنشا 1320) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي استانا (807),  قاراعاندى وبلىسى (394) جانە الماتى قالاسىندا (305) تىركەلدى. بۇدان وزگە شىمكەنت (143), بقو (121), اتىراۋ (98), ماڭعىستاۋ (81), شىعىس قازاقستان (78) وبلىستارىندا دەرت ۇدەپ بارادى. وتكەن تاۋلىكتە 1134 ادام ايىعىپ شىعىپ، ۇيىنە جىبەرىلگەن. وسى سەيسەنبىدە جيىنى 26 ادام قايتىس بولعان.

#COVID_پنەۆمونياسى 29 ماۋسىمدا اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 88 ناۋقاس ەسەپكە الىندى. ۆەدومستۆو دەرەگىنشە، ولار الماتى جانە ماڭعىستاۋ وبلىستارىندا (ارقايسىندا 11-دەن), استانادا (8), اتىراۋ، جامبىل، قوستاناي وبلىستارى مەن شىمكەنت قالاسىندا (ارقايسىندا جەتى-جەتىدەن) انىقتالعان. سونىمەن قوسا، 61 ادام ايىعىپ شىققان، تاعى 3 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 26 122 ناۋقاستىڭ 7,7 مىڭى اۋرۋحانادا، 18 مىڭى امبۋلاتورلىق باقىلاۋدا. احۋالى ناشار 488 ناۋقاستىڭ جاعدايى ناشار، ونداعى 103 ادامنىڭ ءحالى وتە اۋىر. بۇدان وزگە 68 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان استانا، الماتى، شىمكەنت قالالارى مەن اتىراۋ، بقو، قاراعاندى وبلىستارى «قىزىل ايماققا» ەندى. اقمولا، اقتوبە، قوستاناي، ماڭعىستاۋ، پاۆلودار وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 425 مىڭعا، 1 تامىزدان بىلايعى كوروناۆيرۋس پنەۆمونياسى 57 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 482 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 9,7 مىڭى (كۆي+ / U07.1 – 4375, كۆي- / U07.2 – 3449, ىلەسپە اۋرۋلاردان – 1962) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 45-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 40 مىڭداي ادام كوروناۆيرۋسقا قارسى ۆاكتسينانى تولىق العان.

"The Qazaq Times"