Almatı qalası är küni tirkeletin nauqastar sanı jağınan aldıñğı orında twr. Qala köşeleriniñ biri. Säuir 2021 jıl. Foto: QT / Kültegin Aspanwlı

Qazaqstannıñ jartısınan astam böligi «qızarıp-sarğış» tartıp twr. Densaulıq saqtau ministrliginiñ resmi mälimetinşe, elde 5 säuir koronavirus jwqqan 1809 adam, al 4-i küni koronavirus pnevmoniyasına şaldıqqan 7 adam tirkeldi. Qazir elde 28 mıñnan asa adam (U07.1 nemese KVI+ boyınşa 2 330, U07.2 nemese KVI- boyınşa 1003) auırıp jatır.

#U07.1 PTR testi arqılı koronavirus jwqqanı rastalğan nauqastardıñ jartısı Almatı qalası (585) men astanada (242) tirkeldi. Odan keyingi qatarda eñ köbi – Almatı oblısı (278), Aqtöbe (153), BQO (101),  Qarağandı (90), Atırau (64), Aqmola (60) oblıstarında. Ötken täulikte aurudan ayıqqan 1122 adam üyine jiberilgen. Bwdan özge senbi jiını 19 adam qaytıs bolğan.

#U07.2 4 säuir aqparatı bir täulikke keşigip beriletin koronavirus pnevmoniyasına şaldıqqan 7 nauqas esepke alındı. Vedomstvo dereginşe, astanada 4 jäne ŞQO, Almatı, Atırau oblıstarında bir-bir nauqastan tirkelgen. Sonımen qosa, 171 adam ayığıp şıqqan, ökiniştisi 7 adam köz jwmğan.

#Jalpı  DenMin-niñ resmi mälimetinşe, emdelip jatqan 28 333 nauqastıñ 10 mıñı auruhanada, 18 mıñnan astamı ambulatorlıq baqılauda. Ahualı naşar 455 nauqastıñ jağdayı qiın, ondağı 132 adamnıñ häli öte auır. Bwdan özge 77 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan Qarağandı  oblısı jäne  Şımkent qalası «sarı», al Atırau, BQO, Aqtöbe, Aqmola, Almatı oblıstarı, Almatı qalası men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2 mıñğa juıq sırqat jäne 15 şaqtı ölim jağdayı tirkelip jatır. Köktem tuğalı 45 mıñğa tarta (KVI+ 43 mıñ, KVI- 1,5 mıñ) nauqas anıqtaldı, 438 adam (KVI+ 357, KVI- 81) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 257 mıñğa, 1 tamızdan bılayğı koronavirus pnevmoniyası 51 mıñğa juıqtağan. DDSW derekqorı men Wlttıq statistikada Qazaqstanda auırğandar sanı 307,5 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 5457-si (KVI+ / U07.1 – 3129, KVI- / U07.2 – 709, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 49-orında twr.

Ükimettiñ soñğı deregine qarağanda, Qazaqstanda 198 mıñday adam koronavirusqa qarsı reseylik «Sputnik V» vakcinasınıñ alğaşqı dozasın alğan.

"The Qazaq Times"