الماتى قالاسى ءار كۇنى تىركەلەتىن ناۋقاستار سانى جاعىنان الدىڭعى ورىندا تۇر. قالا كوشەلەرىنىڭ ءبىرى. ءساۋىر 2021 جىل. فوتو: QT / كۇلتەگىن اسپانۇلى

قازاقستاننىڭ جارتىسىنان استام بولىگى «قىزارىپ-سارعىش» تارتىپ تۇر. دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 5 ءساۋىر كوروناۆيرۋس جۇققان 1809 ادام، ال 4-ءى كۇنى كوروناۆيرۋس پنەۆمونياسىنا شالدىققان 7 ادام تىركەلدى. قازىر ەلدە 28 مىڭنان اسا ادام (U07.1 نەمەسە كۆي+ بويىنشا 2 330, U07.2 نەمەسە كۆي- بويىنشا 1003) اۋىرىپ جاتىر.

#U07.1 پتر تەستى ارقىلى كوروناۆيرۋس جۇققانى راستالعان ناۋقاستاردىڭ جارتىسى الماتى قالاسى (585) مەن استانادا (242) تىركەلدى. ودان كەيىنگى قاتاردا ەڭ كوبى – الماتى وبلىسى (278), اقتوبە (153), بقو (101),  قاراعاندى (90), اتىراۋ (64), اقمولا (60) وبلىستارىندا. وتكەن تاۋلىكتە اۋرۋدان ايىققان 1122 ادام ۇيىنە جىبەرىلگەن. بۇدان وزگە سەنبى جيىنى 19 ادام قايتىس بولعان.

#U07.2 4 ءساۋىر اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 7 ناۋقاس ەسەپكە الىندى. ۆەدومستۆو دەرەگىنشە، استانادا 4 جانە شقو، الماتى، اتىراۋ وبلىستارىندا ءبىر-ءبىر ناۋقاستان تىركەلگەن. سونىمەن قوسا، 171 ادام ايىعىپ شىققان، وكىنىشتىسى 7 ادام كوز جۇمعان.

#جالپى  دەنمين-ءنىڭ رەسمي مالىمەتىنشە، ەمدەلىپ جاتقان 28 333 ناۋقاستىڭ 10 مىڭى اۋرۋحانادا، 18 مىڭنان استامى امبۋلاتورلىق باقىلاۋدا. احۋالى ناشار 455 ناۋقاستىڭ جاعدايى قيىن، ونداعى 132 ادامنىڭ ءحالى وتە اۋىر. بۇدان وزگە 77 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان قاراعاندى  وبلىسى جانە  شىمكەنت قالاسى «سارى»، ال اتىراۋ، بقو، اقتوبە، اقمولا، الماتى وبلىستارى، الماتى قالاسى مەن استانا «قىزىل ايماقتا» تۇر.

ۇكىمەت مۇشەلەرىنىڭ مالىمەتىنشە، گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە 2 مىڭعا جۋىق سىرقات جانە 15 شاقتى ءولىم جاعدايى تىركەلىپ جاتىر. كوكتەم تۋعالى 45 مىڭعا تارتا (كۆي+ 43 مىڭ، كۆي- 1,5 مىڭ) ناۋقاس انىقتالدى، 438 ادام (كۆي+ 357, كۆي- 81) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 257 مىڭعا، 1 تامىزدان بىلايعى كوروناۆيرۋس پنەۆمونياسى 51 مىڭعا جۋىقتاعان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 307,5 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 5457-ءسى (كۆي+ / U07.1 – 3129, كۆي- / U07.2 – 709, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 198 مىڭداي ادام كوروناۆيرۋسقا قارسى رەسەيلىك «Sputnik V» ۆاكتسيناسىنىڭ العاشقى دوزاسىن العان.

"The Qazaq Times"