Densaulıq saqtau ministrliginiñ dereginşe, 2020 jılğı koronavirus pnevmoniyasınıñ statistikasında 19 mıñ jağday artıq tirkelip ketken.

Prezident Toqaev statistika qoldan kemitildi äri jasırıldı degenimen, ministrlik kerisinşe keysterdiñ artıq enip ketkenin aytadı. Särsenbi küni Ortalıq kommunikaciyalar qızmetinde ötken brifingte densaulıq saqtau vice-ministri Ajar Ğiniyatqızı 19 mıñ jağday aqparattıq jüyege tehnikalıq aqaudan engizilgenin mälimdedi.

«Tekseris, taldau jürip jatır. Qazirgi tañda KVI- (koronavirus pnevmoniyası – QT) boyınşa aldın ala qorıtındı mälimet bar. Aqparat jüyeleri men nauqastardıñ auru tarihın aqtarıp, taldağannan keyin äzirge bıltırğı 19 mıñ jağdaydıñ artıq eseptelip ketkeni anıqtalıp otır. Koronavirus pnevmoniyası alğaş tamız ayınan tirkey bastağan kezde bir pacient birneşe ret jaña jağday retinde esepke alınıp otırğan. 3-4 märte medicina mekemesine jügingen nauqastıñ är jolğı kelisi jaña auru jağdayı bolıp jazılğan. Biz nauqstardıñ JSN jäne diagnoz deregin qayta zerdeley kele KVI- auruşañdığı kemidi. Biıl 1 qañtardan bastap aqparattıq jüye jetildirildi. Qazir säykestendiru nömirlerimen qatañ türde tekserip äri auru damuınıñ merzimimen salıstıra otırıp, dert turalı derek der kezinde berilude», – dedi ol.

Onıñ aytuınşa, ölim-jitim boyınşa derekterdi är medicinalıq wyım özi jürgizedi.

«Bwl jwmıs naurız ayınıñ ayağına deyin jalğasadı. Bıltırğı jıldıq eseppen qosa auruşañdıq pen ölim-jitim boyınşa tüpkilikti qorıtındı jariyalanadı», –  dep tüyindedi Ajar Ğiniyat.

Soñğı derek boyınşa, bıltırğı 1 tamızdan beri Qazaqstanda 49 418 adam koronavirus dertine şaldığıp, onıñ 635-i qaytıs bolğan. Büginge deyin 43 mıñğa juıq adam auruınan ayığıp şıqqan.

Bıltır 17 şildede Toqaev koronavirus statistikasın birizdendiruge mindettegen. «Aqparat qanşa jerden aşı bolsa da, onı qoğam biluge tiis» dep, ministrlikke statistikanı «birizdendirudi» tapsırğan. Alayda ministrlik aymaqtardağı mamandar men jüyeni dayındaymız degen uäjben tirkeu jwmısın 1 tamızğa qaldırdı. Täuelsiz sarapşılar mwnı ükimettiñ «mausım-şilde qırğınınıñ» qarqını basılğanın kütkenimen baylanıstıradı.

Toqaev tüyrep tapsırsa da resmi esep uaqıtılı jüyelenbedi, redakciyanıñ wzaq aylar boyğı talabınan keyin statistikadağı birqatar öreskel qatelikter tüzetildi.

Keyinnen prezident 16 qaraşa «birqatar oblıstarda koronavirus indetine qatıstı jaña jağdaylardı jasıru derekteri anıqtalğanın» mälimdegen. Tipti ol mwnı «ötirikti şınday söyletu asa qauipti qwbılıs» dep sipattadı. Sonday-aq, «atalğan problemanıñ densaulıq saqtau jüyesinde de sozılmalı sipat alğanın moyındau kerek» dep, jağday «ötirikpen jasırılğanın» aşıq ayıptadı. Dese de ministrlik pen öñir äkimderi statistikağa der kezinde enbegen jüzdegen nauqastıñ deregin «jüyeniñ jetilmeui, tehnikalıq qatelik, jükteme auırtpalığı men maman tapşılığınan» körip, «solay bolıp qaldığa» keltirdi.

Prezident sınınan keyin eşbir şeneunik jauapqa tartılğan joq. Arada eki ay uaqıt ötken soñ, Toqaev 26 qañtardağı sözinde statistikadağı olqılıqtı üşinşi ret sınadı. Ol basşılardıñ «reyting jolında ayanbağandıqtan äri jazadan qorqaqtauı sebepti naqtı jağdaydı jasıradı» dedi.

Osı jolı ükimetke «barlıq öñirler men eldiñ jas erekşeligi boyınşa sırqattanuşılıqtıñ naqtı körinisin beretin senimdi statistikalıq zertteudi» qolğa aludı tapsırğan. Twraqtı türde jañarıp otıratın jobanı iske asıruğa bir ay mwrsat bergen. Degenmen vice-ministr Ajar Ğiniyatqızı bwğan eki ay ketetinin habarladı.

Bıltır tamız ayına deyingi pnevmoniya auruı kürt köbeyip, aldıñğı jıldarğa qarağanda 3 esege artqan edi. Därigerler men sarapşılar 256 mıñnan asqan jağdaydı qayta qarap, arasınan koronavirustıq türin ajıratıp, şınayı statistika jürgizudi talap etken, tipti «süzgileudiñ» tiimdi jolın da wsınğan. Alayda Aleksey Coy bastağan vedomstvo basşılığı jwmıstıñ tehnikalıq jağınan qiındığın alğa tartıp bwdan bas tartqan. Bir qızığı – jartı jıl işinde pandemiyanıñ aqiqatın körsetetin statistikağa uaqıt pen energiya tappağan ministrlik auru sanın kemituge kelgende eki ayda köp şaruağa ülgeripti. Ministrlik üşin ädette 90 mıñnan asa qoymaytın pnevmoniyanıñ birden 256 mıñ keyske ösui men oğan koronavirustıñ äseri mäselesinen göri özderi jürgizer bwrın aptalap dayındıq arnağan KVI- esebindegi kemşilik mañızdı.

"The Qazaq Times"