Almatı köşeleriniñ birinde jol boyında twrğan jedel järdem qızmeti. Timiryazev-Gagarin köşeleriniñ qiılısı. 22 aqpan 2021 jıl. Foto: QT

21 aqpan koronavirus jwqqan 699 adam, al 20 aqpan koronavirus pnevmoniyasına şaldıqqan 13 adam tirkeldi. Qazir elde 21 mıñnan asa adam (U07.1 nemese KVI+ boyınşa 13 679, U07.2 nemese KVI- boyınşa 7606) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Almatı qalası (101), Pavlodar (96),  Aqmola (73), astana (72), Qostanay (67) öñirlerinde. Ötken täulikte aurudan ayıqqan 642 adam üyine jiberilgen. Sonday-aq jeksenbide jiını 5 adam: Almatı (2), BQO (1), Pavlodar (1), Mañğıtau (1) oblıstarında qaytıs bolğan.

Keyingi aptada Almatı virus jwqqandar sanı jağınan öñirler arasında alğaşqı qatarlardan körindi. Degenmen qaladağı epidjağday «jasıl deñgeyde» dep sanaytın bas sanitar därigeri Jandarbek Bekşin 13 aqpan karantin şarasın jeñildedetin jaña qaulı şığardı. Qwjatqa säykes, qoğamdıq tamaqtanu orındarı tün jarımğa deyin, bazar-sauda orındarı apta boyı, sauna-basseyn jäne sanatoriylerge, aymaqtar arasında qatınaytın avtobustarğa jwmıs isteuge rwqsat etildi.

#U07.2  Senbi küni, yağni aqpannıñ 20-sı koronavirus pnevmoniyasına jatatın 13 nauqas jäne 2 ölim jağdayı tirkelgen.

Pnevmoniya anıqtalğan nauqstardıñ eñ köbi – Jambıl (5), Aqmola (3), Atırau (2), Qarağandı, Qostanay oblıstarında (ärqaysında bir-birden) jäne astanadan (1). Sonımen qosa, Jambıl oblısı men Şımkent qalasında bir-bir adam köz jwmğan.

#Jalpı  Ekinşi tolqındağı kündelikti körsetkiş qwbılmalı. Qañtar ayınıñ ortasınan beri täuligine wdayı mıñnan kem emes jäne sol şamalas jağday anıqtalsa, ötken senbiden qayta kemi bastadı. Mäselen, koronavirus pen osığan wqsas pnevmoniyanı qosa eseptegende ötken beysenbi 946, jwma 865, senbi 779  nauqas anıqtalğan.

DenMin-niñ resmi mälimetinşe, emdelip jatqan 21 994 nauqastıñ 4838-i auruhanada, 16 474-si ambulatorlıq baqılauda. Ahualı naşar 242 nauqastıñ jağdayı qiın, ondağı 53 adamnıñ häli öte auır. Bwdan özge 43 sırqat ökpeni jasandı jeldetu apparatımen tınıstap jatır.

Bıltır jeltoqsan ayınıñ alğaşqı jartısında 13 254, biılğı qañtar ayınıñ birinşi jartısında 12 537, qalğan jartısında 21 919 adam  jäne aqpan ayınıñ däl osı uaqıtında 16 091 nauqas tirkelgen. Jalpı 2021 jıl bastalğalı Qazaqstanda 55 mıñ adamnan auru anıqtalğan. Jıl basınan beri Pavlodar (8 mıñ), Aqmola (6,1 mıñ) oblıstarı, Almatı qalası (6,2 mıñ)  jäne astanada (6 mıñ) jağday uşıqqan. Al Qızılorda (400), Aqtöbe (587), Mañğıstau (542), Türkistan (605) öñirleri men Şımkent (703) qalasında ahual twraqtı.

Äzirge virus taralu qateri jağınan BQO, Aqmola, Palodar, Qostanay oblıstarı men astana – sarı aymaqta twr.

Aqparat ministrliginiñ coronavirus2020.kz saytı men Densaulıq saqtau ministrliginiñ media resurstarında jariyalanğan derekter birneşe aydan beri qate berilip kelgeni jaylı materialdar jariyalap, aqparat qwraldarına eskertkenbiz. 26 jeltoqsannan bastap ministrlik kemşiligin moyındap, resmi habarlamanıñ formasın ögertti. Statistikanıñ pnevmoniyağa qatıstı merzimin körsetip jariyalauğa köşti. Al büginnen bastap eki diagnoz boyınşa da qaytıs bolğandardıñ är küngi esebi berudi keş te bolsın qolğa aldı. Kemşiligi sol – dertten köz jwmğandardıñ merziminde qayşılıq bar.

(!) Pandemiya moderatorı – ministrlik tek senbi-jeksenbide ğana emes, mereke künderi de statistikanı tolıqtay jürgizuge qauqarsız. Mäselen, jeltoqsan ayınıñ 1, 16, 17, 18-i jäne 19-ına, 1-4, 7 qañtarğa tiesili derekter eselep kemigen. Küzdiñ ortasında sol kezdegi DenMin-niñ resmi-erikti ökili Bağdat Qojahmetov ekinşi tolqında demalıs künine qaramastan statistikanı tolıq kölemde jürgizuge uäde bergen edi. Biraq is jüzinde olay bolmay şıqtı. 

The Qazaq Times redakciyası tömendegi kesteni resmi mälimettiñ rettelgen nwsqası dep sanaydı.

Osı qıstıñ basında bas memlekettik sanitar-däriger Erlan Qiyasov Qazaqstanda kezekti tolqınınıñ şarıqtau kezeñi qañtar-aqpan aylarına, al ministr Aleksey Coy naurız ayınıñ soñına qaray twspa-tws keletinin mälimdegen.

13 naurızdan beri COVID-19 infekciyasın jwqtırğandar qatarı 208 mıñnan assa, 1 tamızdan bergi koronavirus pnevmoniyası 49 mıñğa juıqtağan. DDSW mälimetinşe, Qazaqstanda auırğandardıñ sanı 256 mıñğa, al Wlttıq statistikada 257 mıñğa jaqındağan. Degenmen Ükimet koronavirus pen onıñ pnevmoniyasın eki bölek esepteydi. Osı uaqıtqa deyin KVI+ diagnozı boyınşa jaña anıqtalğan nauqastar aymaqtardağı körsetkişi kündelikti, al KVI- deregi tek jiıntıq mände berilip kelgen. QT birneşe ay boyı ministrlikke osı mäseleni köterip, ondağan swrau joldağan. Aqpannıñ 3-inen ğana koronavirus pnevmoniyasınıñ kün sayınğı aymaqtıq esebi jariyalana bastadı.

Pandemiya bastalğalı jalpı virus jwqqandardıñ 4372-si (KVI+ / U07.1 – 2699, KVI- / U07.2 – 612, ilespe aurulardan – 1061) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 1061 adamdı jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 50-orında twr.

"The Qazaq Times"