Qazaqstannıñ densaulıq saqtau ministri Eljan Birtanov. Foto: aşıq derekköz

Bügin densaulıq saqtau ministri Eljan Birtanov 24 aqpanda «virus  şıqqan laynerdegi tört qazaqstandıqqa» qatıstı Japoniyadan el astanasına wşıp kelgen jolauşılardan keşirim swradı.

Bwl jöninde ol bügin ükimet otırısınan şıqqan soñ jurnalister swrağına jauabında ayttı.

Bas därigerdiñ aytuınşa, SCAT kompaniyasınıñ Tokiodan elordağa wşatın wşağında Diamond Princess laynerinde karantinde bolğan tört jolauşı barın ministrlik basqa jolauşılarğa «eskertip ülgermepti».

– Wşaqta bolğan özge jolauşılardan keşirim swraymız. Jolauşılardı wşaqqa otırğızu turalı şeşim qabıldanğanda, eskertuge uaqıt bolmadı, – dedi ol.

Birtanov Japoniya jağalauında karantinde twrğan Diamond Princess laynerinde bolğan Qazaqstannıñ tört azamatınıñ qolında «densaulığı jaqsı» degen medicinalıq anıqtaması bolğanın, sondıqtan Japoniya tarabı olardıñ wşaqqa otıruına kedergi jasamağanın ayttı.

«Tört adamğa tağı üş türli test jasaladı. Bwl jaylı qosımşa mälimet beremiz» dedi ministr.

24 aqpan tünde Japoniyadan Nwr-Swltanğa kelgen äue reysinde 20 adam bolğan. Törteui Diamond Princess laynerinde bolğandar, 8-i ekipaj müşesi, 8-i özge jolauşı. Ministrdiñ sözinşe, barlığı karantinge jatqızılğan.

20 qañtarda Japoniyanıñ Yokogama qalasınan teñizge sayahatqa şığıp, aqpannıñ basında koronavirusqa baylanıstı portqa oralğan, 3700 jolauşısı bar Diamond Princess kemesi aqpannıñ 19-ına deyin karantinde twrğan. Kemede 350-den astam adamnıñ koronovirus jwqtırğanı anıqtalğan.

"The Qazaq Times"