Gülnara Kärimovağa Özbekstan biligi qısım körsetude – dep mälimdedi onıñ qorğauşısı Greguar Manja.

«Nemis tolqını» aqparat agenttigine bergen swhbatında Manja: «Özbekstan biligi Gülnara Kärimovağa Şveycariyadağı dünie-mülki men zañdı qwqıqtarınan bas tarttıru üşin psihologiyalıq jäne fizikalıq qısım körsetude» - dep mälimdedi.

Osıdan birneşe kün bwrın Özbekstan Bas prokuraturası «Gülnara Kärimova jazasın öteu şarttarın bwzğanı üşin jalpı rejimdegi koloniyağa auıstırıldı» - degen habar taratqan.

Gülnara Kärimovanıñ qızı Iman onıñ anasın Bas prokuratura qızmetkerleri koloniyadan bosatılğannan keyin Taşkenttegi päterinen alıp ketkenin mälimdedi. Ol öziniñ «Instagram» paraqşasında: «Sağat 19:00 şamasında özbek prokuraturasınıñ qızmetkerleri Taşkenttegi päterime basa-köktep kirip keldi. Merziminen bwrın şarttı türde bostandıqqa şıqqan anam osı päterde 2018 jıldıñ mausım ayınıñ soñınan beri twradı. Birneşe minuttan soñ prokuraturanıñ özge qızmetkerlerimen birge jetip kelip, anamdı belgisiz jaqqa alıp ketti», – dep jazdı. Aqpan ayınıñ ortasında Gülnara Kärimovanıñ wlı Islam «Instagram» jelisinde tergeuşilerdiñ jazasın ötep jatqan anasına qısım körsetip, uaqıtılı medicinalıq kömek körsetpegendigin aytıp, prezident Şavkat Mirzieevten kömek swrağan.

Gülnara Kärimovanıñ üstinen qılmıstıq is 2015 jılı qozğalğan. Däl osı jılı Taşkent qalalıq sotı onı «asa iri kölemde qarjı jımqıru», «bopsalau», «salıqtan jaltaru» ayıptarı boyınşa kinäli dep tanıp, bes jılğa bas bostandığınan ayırğan.

2017 jıldıñ şilde ayında Özbekstan Bas prokuraturası Gülnara Kärimovanıñ üstinen tağı birneşe qılmıs boyınşa is qozğalğandığın mälimdedi. Jañadan tağılğan ayıp boyınşa, eks-prezident qızı Özbekstanğa 2 mlrd dollar köleminde ziyan keltirgen. Özbekstan resmi organdarınıñ bwl mälimdemesinen keyin Gülnara Kärimovanıñ älemniñ 12 elindegi bank şottarı men jıljımaytın mülikteri bwğattalğan.

"The Qazaq Times"