Wyğır audanı apparat basşısın kim tayrañdatıp jür. Foto: Tengrinews.

Üş jılğa kölik tizgindeu qwqığınan ayırılğan Wyğır audanınıñ aparat basşısı Swltan Islamovtı kim tayrañdatıp otır? Memlekettik qızmetker retinde öreskel qatelikterge barsa da nege qızmetinen şettetilmeydi?

Bwnday swraulı äri salmaqtı uäjdi «Wrpaq parızı» qoğamdıq birlestiginiñ törağası Jänet Kerimqwlov ayttı. Biz erkin pikir alañı retinde aymaq twrğınınıñ osı bir aşı pikirin qaz qalpında berip otırmız.

–       Estigen qwlaqta jazıq joq, «Bizdiñ Swltannıñ qolında añızdağı Süleymen Swltannıñ jüzigi bar. Sebebi, onıñ amandığın Amandıqtıñ özi jauaptı etken» degendi de estidik. «Jetisu» gazetiniñ (oblıstıq – red.) biılğı 29 qırküyektegi №108 canında jariyalanğan Ädep keñesiniñ otırısı turalı maqalada audan äkimi apparatınıñ basşısı Swltan Islamovtıñ kuäliksiz kölik jürgizgeni, mas küyinde rul'de wstalğanı üşin sot şeşimimen 28.12. 2018 merzimine deyin kölik jürgizuge qwqığı joqtığı anıqtalğanın, oğan qatañ sögis berilgenin oqıdım. Ol osı qızmetke osımen üşinşi ret kelip otır. Onıñ aldıñğı eki retinde de mäsele köterilgen. Aytalıq, özine tieseli ükimet bergen üydi jaqın tuıstarına berip, özi Şonjıdağı 30 şaqırım qaşıqtıqtağı Ülken Aqsu auılınan kündelikti qızmettik kölikpen qatınap jürgeni turalı şağım tüsken edi. Alayda bwl mäsele belgisiz sebeptermen ayaqsız qaldı. Bwdan bölek, S. Islamov üyrenşikti apparat basşısı lauazımına kezekti üşinşi ret kelerdiñ aldında audan aqsaqaldarınıñ pikirine audan äkimi Ş. Nurahnovtıñ  pısqırmağanı, osı jayğa baylanıstı altı aqsaqaldıñ oblıs basşısına jazğan pikirleri de eskerilmegeni esime tüsip, «Siınğanıñnan süyengeniñ küşti bolsın» degen söz eriksiz oyğa oralğan-dı. Oylañızşı, audandağı äkimnen keyingi lauazımdı twlğanıñ osınday öreskel, tipti qılmıstı äreketterinen soñ qarapayım halıqtıñ bilikke degen senimi joğalatını aqiqat. Artımızdağı wrpaqqa körsetken ülgimiz osı bolsa, «Sengen qoyım sen bolsañ, küysegen auzıñdı wrayın» demegende ne deymiz? – deydi Jänet Sädiwlı.

Osı jaydan soñ Jänet Kerimqwlov aytqan Ädep keñesine de habarlastıq. Keñes törağası, QR memlekettik qızmet isteri jäne sıbaylas jemqorlıqqa qarsı is-qimıl agenttigi Almatı oblısı boyınşa departamentiniñ basşısı Serikbay Nwrğisaev bwl mäsele turalı:

– Sizge ne tüskenin men bilmeymin ( qanday arız – red.). Bizdiñ balalar reydke şıqqanda ol jeke menşik maşinasın kuäliksiz aydağan. Ol jwmıstan alınatın statiya emes. Ol Ädep jönindegi kodekske qayşı kelgen. Biz oğan kodeks şeñberinde sögis berdik, – deydi Serikbay Örikbaywlı.

Osılayşa söziniñ «dämin» birıñğay «ol» sözimen keltirgen departament basşısı özderiniñ zañnan attap öte almaytının, tiisinşe, S. Islamov mäselesi de sol kodeks şeñberinde qaralğanın atap ötti.

Ayta keteyik, 2018 jılğı 4 tamız küni Wyğır audanında QR memlekettik qızmet isteri jäne sıbaylas jemqorlıqqa qarsı is-qimıl agenttiginiñ «Joldarda sıbaylas jemqorlıqtıñ deñgeyin tömendetu boyınşa 10 qadam» jobasın iske asıru maqsatında arnayı reydtik is-şaralar wyımdastırılğan bolatın. Naqtıraq aytqanda, atalğan jobanıñ besinşi qadamındağı «Zañ aldında barlığı teñ» principi közdelgen. Oblıstıq işki ister departamentiniñ jergilikti policiya qızmetimen birlesip atqarılğan şarağa  audandıq «Sıbaylas jemqorlıqqa qarsı birinşi media ortalıq» qoğamdıq birlestiginiñ ökili B. Isabaev ta qatısadı.

Reydtik is jürgizu kezinde Wyğır audanı äkiminiñ apparat basşısı S. Islamovtıñ tizgindeuimen V 844 ATO memlekettik nömirli «Nissan X-Trail» markalı avtokölik toqtatıladı. Policiya qızmetkerleri qwjattardı tekseru barısında S. Islamovtıñ jürgizuşi kuäligi Wyğır audanı sotınıñ şeşimimen 3 jıl merzimge, yağni, 2018 jıldıñ 28 jeltoqsanına deyin basqaru qwqığınan ayırılğanı anıqtaldı. Osığan baylanıstı S. Islamovqa qatıstı äkimşilik qwqıq bwzuşılıq turalı hattama toltırılğan.

Eñ qızığı – S. Islamov mäselesine oray respublikalıq bwqaralıq aqparat qwraldarında da birneşe ret material jariyalanıp, onıñ bwnday lauazımdı qızmetke layıq emes ekeni aytılsa da, eş nätije bolmağan. Bälkim, törtinşi biliktiñ töte joldağan saualın töbedegiler tıñdamadı, bälkim, «küştiniñ artı diirmen tartadı» degen maqaldıñ aqiqatınan ba edi, kim bilipti?!

Ägäräki, olay bolsa, soñğı uaqıtta el auzında jattala bastağan «Bizdiñ Swltannıñ qolında añızdağı Süleymen Swltannıñ jüzigi bar. Sebebi, onıñ amandığın Amandıqtıñ özi jauaptı etken» degen pikirge halıqtıñ birjola senuine tura kelgendey?..

                                                                   “The Qazaq Times”