BWW aldağı eki jıl işinde tuğan elderine qaytatın Rohindja mwsılmandarınıñ M'yanmadağı qauipsizdigi üşin alañdauşılıq bildirdi. Ötken jıldıñ qaraşa ayında Bangladeş pen M'yanma ökilderiniñ birlesken kezdesuinde bosqındardı Birmağa qaytarudıñ josparı belgilengen bolatın. Oğan säykes, ayına 1 mıñ 550 bosqın Bangladeştegi tranzittik lager'lerden M'yanmağa oraladı. Jergilikti policiya men Rohindjanı qwtqaru armiyası müşeleriniñ arasında bolğan qaqtığıs saldarınan tuğan jerin tastap ketken mwsılmandardıñ birqatarı, özderine azamattıq bermegen memleketke qaytudan bas tartıp otır. 

Bangladeştiñ Sırtqı İster ministrliginiñ habarlauınşa, bosqındardı tirkep, anıqtama berumen jäne olardı M'yanmada qabıldaumen aynalısatın eki türli jwmıs tobı qwrıladı. 25 tamız oqiğasınan keyin körşi memleketke bas sauğalap kelgen 650 mıñğa juıq Rohindja mwsılmanın M'yanmağa attandıru üşin 5 tranzittik lager' qwrılıp, qarsı memlekette 2 qabıldau pukti iske qosıladı dep kütilude. BWW-nıñ bosqındar mäselesi jönindegi agenttiginiñ qızmetkeri Karoline Glak Äl-Jazira aqparattıq agenttigine bergen swhbatında mwsılmandardıñ Bangladeşte de, M'yanmada da qauipsizdikte bolarına kepildik berilui tiis ekenin atap ötti.

Rohindja mwsılmandarı Birmada bwrınnan twratındarına qaramastan, M'yanma biligi olarğa azamattıq bermey kelgen. Jası jüzden asqan Abd-us-Salam Rohindja mwsılmandarına M'yanmada qalu qauipti ekenin aytadı. "Äl-Jazirağa" bergen swhbatında: "Bizdi M'yanmağa qaytarmañızdar, olar bärimizdi tügel öltiredi" degen. Bangladeştegi bosqındar lagerin panalap otırğan tağı bir mwsılman Taslima Begam M'yanmağa qaytqannan, "ölgeni artıq ekenin" aytqan.

BWW men qwqıq qorğau wyımdarı Bangladeş pen M'yanma arasında jasalğan repatriaciya josparı bosqındardıñ qauipsizdigin qamtamasız ete alatınına senbeydi. Karoline Glak Rohindja mwsılmandarına azamattıq beru mäselesi qarastırılıp, zañ jüzindegi qwqıqtarına qol jetkizu mümkindigi qarastırılmayınşa, bosqındar M'yanmağa qaytu josparın qoldamaytının habarladı.

“The Qazaq Times”