Qıtaydağı aua lastanu. Foto: Reuters.

Germaniyada ötip jatqan klimat özgeristerine baylanıstı halıqaralıq otırısta, Birikken Wlttar Wyımı 2017 jılı atmosferada kömir qışqıl gazınıñ (CO2)bölinip şığuı artıp ketkenin, bwl tört jıldan beri bolmağan jağday ekenin mälimdedi. BWW-nıñ mälimetine qarağanda, bwğan sebep bolğan jağday, Qıtaydıñ öndiriske kömirdi köbirek qoldanuınan bolğan. Bwl turalı BBC onlayn qızmeti habarladı.

Zertteuşilerdiñ pikirine qarağanda, bwl ürdis jalğasa beretin bolsa, 2020 jılğa barğanda kömir qışqılınıñ auadağı mölşeri eñ joğarı şekke jetip, qaytalay tizgindelmese ğalamdıq jılınudı tañqalarlıq jağdayda tezdetedi eken. Kömir qışqıl gazınıñ auadağı mölşeri jılına üş payızğa joğarlau procesi 2014 jılğa kelgende tejelgen edi. Odan keyin älem ekonomikasınıñ sayabırsuına baylanıstı öndiristerden bölinetin kömir qışqıl gazınıñ mölşeri tömendey bastap edi. Zertteuşiler qazirdiñ özinde auadağı CO2-niñ mölşeri eñ joğarı şekke jetti dep boljaydı.

BWW jariyalağan mälimetke säykes, CO2-niñ mölşeri 2017 jılı 2 payızğa artıp otır. Oğan Qıtay ekonomikasınıñ ösui men kömirdi köptep qoldanuı sebep bolğan. Qıtayda bolğan qwrğaqşılıqtan özen deñgeyleriniñ tömendep, su arqılı alınatın elektr quatı azayğan. Beyjiñ biligi onıñ ornın toltıru üşin jılu elektr stanciyalarında köptep kömir istetken.

Kezindegi «Parij kelisimindegi» talaptar negizinde, AQŞ pen Europa elderi kömir qışqıl gazınıñ bölinuin azayttı. Biraq, kelisimde belgilengen şekke deyin tömendete almadı.

“The Qazaq Times”