Türkiyanıñ arnayı qızmetkerleri soñğı eki apta işinde 30-dan astam reseylikti qamauğa aldı. Bwlardıñ Reseydegi mwsılman azamattarı ekeni anıqtalğan. Qamauğa alınğandardıñ aytuınşa, biliktiñ qısımınan keyin öz ölkelerinen ketip qalğan. Mälimetterge qarağanda, soñğı aylarda tegi reseylik bolğan 80-nen asa kümändi adam twtqındalğan. Bwl turalı  BBC-diñ resmi saytı habarladı.

Qamalğandardıñ arasında qarttar men äyelder de bar. Wstalğandar turalı mälimet bergen reseylik emigranttar aqparat qwraldarına atı-jönin aytudan qorqadı. Türkiyanıñ resmileri bwl is turalı naqtı mälimet beruden bas tartqan. Onıñ sebebin ötken jılğı töñkeristen keyin jolğa qoyğan qatañ talap boyınşa, wlttıq qauipsizdikke baylanıstı ister turalı mälimet beruge jol bermeytinin aytadı. Tek, reseylik mwsılmandardıñ wlttıq qauipsizdikke qater töndiruinen alañdap, osı qadamdı jasadıq desedi.

Bwl istiñ jay-japsarın swrastırğan aqparat qwraldarına Türkiyanıñ resmi ökilderinen anıq jauap joq. Tek ötken jılı Türkiyada bolğan töñkeristen keyin elde jolğa qoyılğan özgeşe saqtıq şaralarınıñ biri ekenin alğa tartadı. Soğan baylanıstı wlttıq qauipsizdikke sayatın mäseleler boyınşa mälimet taratuğa şekteu qoyılğan.

Sarapşılardıñ pikirine qarağanda, bwl qadam Ankara men Mäskeu biliginiñ ımıralasa bastağanın tüsindiredi. Reseyden emigrant bolıp sırtqa şıqqan mwsılmandardı Mäskeuge qarastı arnayı qızmetkerler Türkiya arqılı twtqındap jatqan boluı mümkin delinude. Reseydiñ arnayı swrauı bolmasa olar turalı isti anıqtauğa aqtauşı zañgerler de aralasa almaydı eken.

Türkiyağa barğan reseylik mwsılmandardı qamauğa alu bwdan bwrın da bolğan. Eki el arasında qılmıstıq ister boyınşa qudalanğandardı qaytarıp beru turalı kelisim 2014 jılı jasalğan. Tek biılğı jıldıñ mausım ayında ğana atqarıldı. Sol rette Resey İşki ister ministrligi 800-ge juıq reseylik mwsılmandı «Islam Memleketi» terrorlıq wyımına qatısuğa äreket etti dep ayıptap, Türkiyadan alıp ketken. Radikaldı toptarğa qatısı bar degen ayıppen elge qaytarılıp alınğandar arasında Şeşenstandağı soğısqa qatısı bar dep qudalanğandar da bolu mümkin. Türkiyadağı reseylik mwsılmandar wstalğandardıñ köbi ekstremizmmen baylanısı joq jazıqsız adamdar ekenin aytadı.

Türkiya ükimetiniñ janında qwrılğan SETA analitikalıq ortalığınıñ mälimdemesine sensek, Resey jaqtıñ Türkiyadağı mwsılmandar jönindegi aytqandarı negizsiz bolmasa kerek. Bwl eki el arasındağı sayasatpen baylanısı joq degendi alğa tartadı. Sonday-aq, olar «soñğı bir jarım jıl işindegi Türkiyada bolğan terrorlıq şabuıldardıñ ekeui reseylik mwsılmandarmen qatısı bar jäne olar KMŞ wyımınıñ müşeleri» degen mälimetti jetkizdi.

2016 jılı 28 mausımda Stambul äuejayında reseylik jäne KMŞ wyımınıñ müşesi bolğan üş adam jolauşılarğa oq atqan jäne özderin jarıp jibergen. Ükimet jağınan terakt dep qaralğan oqiğada 45 adam köz jwmğan.

«2017 jılı 1 qañtarda tegi özbekstandıq azamat Stambuldağı tüngi klubta oq atıp, 39 adam qaza tapqan. Osıdan keyin Türkiyanıñ arnayı qızmetkerleri orıs tildi mwsılmandar köbirek şoğırlanğan orındarda arnayı operaciyalar alıp bardı», - deydi SETA.

Türkiyadağı reseylik mwsılmandardıñ naqtı sanın eşkim bilmeydi. Statistika mekemeleri olardı jalpı migraciya işinde sanap keledi. Qazirgi kezde Süriya men Irakta şebinen ayırılğan «IM» sodırları Türkiyağa qaşıp baruda. Türkiya İİD-niñ mälimetinşe, Süriya men Iraktan şekara bwzıp ötuge äreket etkenderdiñ basım köbi reseylik mwsılmandar. Mwnday jağdayda Türkiyanıñ ekstremizmmen küresude Reseymen ıntımaqtasuı orındı siyaqtı. Degenmen, Reseydiñ arnayı qızmetkerleri Türkiyadağı reseylik mwsılmandar arasında Mäskeudiñ Süriyadağı qadamdarına qarsı pikirin köbirek bildirgenderdi de ekstremister qatarına qosıp otırğan boluı bek mümkin.

Türkiyadağı reseylik mwsılmandar endigi jerde özderiniñ ömirleriniñ qauipsizdiginen alañdap otırğanın jetkizdi. Osıdan bwrın da Reseyden şıqqan keybir belsendi twlğalar Oñtüstik Kavkazda jäne türik jerinde öltirilgen bolatın. Bwl jağında Mäskeudiñ qwrığı wzın ekeni jwrttıñ bärine mälim. Keñesten qalğan «üş ärip» qazirdiñ özinde belsendi küyde jwmıs istep keledi.

“The Qazaq Times”