Soçidegi kezdesu keşe 29 qırküyek keşke qaray ayaqtaldı. Foto: Anadolı aqparattıq agenttigi

Soçi qalasında Resey prezidenti Vladimir Putin Türkiya prezidenti Rejep Tayıp Erdoğanmen kezdesti. Taraptar Resey-Türkiya arasındağı jäne aymaqtıq birqatar taqırıptardı talqıladı. Bwdan bwrın Türkiyanıñ resmi basılımdarı prezident Erdoğannıñ kezekti Resey saparınıñ mañızı zor dep körsetken bolatın.

Türik aqparat qwraldarı Soçi sammitiniñ bastı taqırıbı Süriya mäselesi dep körsetti, Erdoğan kezdesude eñ aldımen Süriya jerindegi kürt küşteriniñ mäselesin kötergen. Mäskeu Süriyadağı ıqpaldı oyınşı sanaladı, soñğı uaqıttarda Resey qarulı küşteri baqılauda wstap twrğan jerlerde PKK küşteriniñ Türkiyağa bağıttalğan qarulı äreketteri köbeygen, bwl Ankaranıñ mazasın qaşıruda. Kezdesude Erdoğan şabuıldardıñ aldın aluın talap etken.

Türik jäne orıs liderleri Süriya, Auğanstan jäne Libiya taqırıptarın talqılap, olardan keletin bosqındar tolqınına qarsı şaralar turalı da keñesken. Eki el prezidentterimen qatar barlau wyımdarınıñ jetekşileri de kezdesude bolğan. Bwl Auğanstan men Süriya boyınşa Mäskeu men Ankara birqatar jaña mälimetterdi almasqan boluı mümkin degendi bildiredi.

Orıs aqparat qwraldarınıñ habarına qarağanda Putin men Erdoğan ortasındağı kezdesu üş sağatqa juıq jalğasqan. 2 sağat 45 minuttıq kezdesudiñ soñına qaray taraptar Ankara men Mäskeu arasındağı qarım-qatınastı jaqsarta tüsudi de köbirek söz etipti. Bwl boyınşa liderder orıs-türik arasında kün sayın artıp kele jatqan sauda-sattıq jäne qorğanıs önerkäsibi boyınşa ıntımaqtastıq kölemin mısal etken.

Kezdesude aytılğanda Türkiya Reseyge 1,5 mlrd AQŞ dolları köleminde investiciya salğan bolsa, orıstıñ türik jerindegi investiciyası 6,5 mlrd dollardı qwraydı. Soçi kezdesuinde sonday-aq Türkiyanıñ Reseyden satıp alğan S-400 zımıran qorğanıs jüyesi men Qarabaq kelisimi de qayta pısıqtalğan.

The Qazaq Times