Foto: Centre1.com

2017 jıldıñ 1 qazanınan bastap Özbekstan Qazaqstanda şığarılğan jäne osı elden jetkiziletin transport türlerine akcizdik salıq mölşerlemesin tömendetedi. Bwl turalı Özbekstan zañdarınıñ wlttıq  mälimetter bazasında jariyalanğan. 

«Özbekstannıñ sırtqı ekonomikalıq qızmetin odan äri jetildiru jönindegi şaralar turalı» qaulısına säykes, akciz stavkası kedendik qwnnan 2%-ğa deyin tömendetildi. Bwl qwjatqa Özbekstan Prezidenti Şavkat Mirzieev 2017 jıldıñ 29 qırküyeginde qol qoyğan.

Al bwdan bwrın qazaqstandıq avtoöndiruşiler QR Wlttıq ekonomika ministri Timur Süleymenovke "Özbekstanmen aradağı kölik tasımalı şarttarın teñestirip beru turalı" ötiniş aytqan. Olardıñ sözinşe, 1996 jıldan beri özbek avtoöndiruşileri Qazaqstan narığına 720 mln dollarğa 85 mıñ kölik eksporttağan. Al osı uaqıt aralığında Özbekstannıñ akciz mölşerlemeleri joğarı bolğandıqtan qazaqstandıq kölikter atalğan elge jiberilmegen.

Ayta keteyik, soñğı uaqıtta Qazaqstan men Özbekstan jaña qarım-qatınastar ornata bastadı. Osınday ekonomikalıq-sayasi özgerister köptegen şeteldik sarapşılar men batıs memleketteriniñ "Ortalıq Aziyada Qazaqstan men Özbekstan köşbasşı boluğa baqtalas bolıp keledi" degen pikirin joqqa şığardı.

“The Qazaq Times”