Almatı qalasınıñ äkimi Bauırjan Baybek. Foto: 365Info

Bügin tamızdıñ 9 küni Bauırjan Baybektiñ Almatı qalasına äkim bolıp tağayındalğanına 2 jıl. Osığan baylanıstı biz onıñ osı uaqıt aralığında ne tındırğanına qısqaşa toqtaludı jön kördik.

Bauırjan Baybek 2015 jılı 9 tamız küni Almatı qalasınıñ äkimi bolıp tağayındalğalı şaharda köp dünie özgerdi. Ol kele salıp qalada jıldar boyı jwmıs istep kelgen tramvay jelisin toqtattı. Qoğamdıq kölikterge Ahmetjan Esimov qoyıp ketken validatorlardıñ orınına qala twrğındarına köp qiındıq äkelgen «Oñay» elektrondı tölem jüyesin engizip, avtobustar jüretin kölik jolağın saldı. Wzaq jıldar boyı qoğamda dau tuğızıp kelgen «Kök Jaylau» kurrorttıq keşenin qarjılandıru men saludı toqtattı. Ülken köşelerdiñ boyında ornalasqan ğimarattardıñ qorşauların aldırıp, audandıq, qalalıq, policiya bölimşeleriniñ sırtına biik dual saldırdı. Bwl endi bıltırğı policiya bölimşesi men WQK ğimaratına jasalğan terrorlıq şabuıldan keyin jasalğan qauipsizdik şaraların küşeytu ekendigi belgili. Biraq osı jerde ayta ketetin bir jayt, bıltır Almatıda terrorlıq akt bolğanda Bauırjan Baybek halıq aldına şığıp bir auız ün qatqan joq edi. Al onıñ qazirgi «qaqpasız qala» bağdarlamasına qarap, policiyadan özgeleriñ aldağı uaqıtta terrorlıq şabuıl bolatın bolsa, lañkesterge esikteriñdi ayqara aşıp qoyıñdar degenge meñzeydi.

Jalpı Bauırjan Baybek kelgeli Esimovtıñ kezinde eskerilmegen dünielerdiñ köbi qolğa alındı. Solardıñ biri 31 mamır quğın-sürgin qwrbandarın eske alu küni aşılğan 1931-1933 jıldardağı aşarşılıq qwrbandarına arnalğan eskertkiştiñ aşıluı. Imanğali Tasmağanbetovtıñ bastamasımen Ahmet Baytwrsınovtıñ mwrajayın memleket qamqorlığına alıp, kürdeli jöndeu jwmıstarın jürgizuge baylanıstı bastamalardıñ köterilui boldı. Ol Ahmetjan Esimov äkim bolıp twrğanda qalada bolmaytın küni yağni 16 jeltoqsan täuelsizdik küninde halıqpen birge alañğa barıp, jeltoqsan qwrbandarına arnalğan eskertkişke gül şoqtarın qoydı. Bwl onıñ qazaq halqına qarata jasağan eñ bir sätti qadamdarınıñ biri boldı.

Biraq Almatıda Bauırjan Baybekke Esimovten estelikke qalğan bir dünie özgerissiz qaldı. Ol jañbır jausa «üyrek wşıp, qaz qonatın», şamdarı bir öşip, bir janatın romantikalıq köşeler men jılına eki-üş märte örtenbese saudası jürmeytin «Baraholka» bazarı. Ärine aldağı uaqıtta «Bolaşaqtıñ» tülegi, prezidenttiñ süyikti sarbazdarınıñ biri Bauırjan Baybek bwl olqılıqtardıñ orının toltıratını sözsiz. Biraq onıñ qay uaqıtta bolatının alda kele jatqan küz, köktemdegi köşe kelbetinen bayqaytın bolamız.

“The Qazaq Times”